Publicisti Besnik Mustafaj i ftuar në rubrikën “Opinion” në studion e lajmeve në Neës24 foli për bustin e Pjetër Arbnorit, rikthimin e Genc Rulit në PD si dhe aksionet e opozitës.
Lidhur me një përfshirje të vetë Mustafajt në strukturat drejtuese të PD, ish-minstri tha se nuk do ta tentojë një gjë të tillë por do të japë kontributin e tij për partinë.
Po ashtu Mustafaj, kritik i hapur i Bashës, tregoi edhe për marrëdhëniet e tij me kryetarin e opozitës me të cilin tha se kishte pirë vazhdimisht kafe.
“Unë për veten time kam pirë vazhdimisht kafe me z.Basha pavarësisht se kam qenë shumë kritik me të, edhe gjatë kohës post-zgjedhore, kur u bë fushata për kryetarin e ri. Unë kam pirë shumë herë kafe me të, nuk i kam refuzuar asnjë ftesë, qoftë në zyrë apo dhe në kafenetë e Tiranës.
Nuk tentoj të jem pjesë e strukturave drejtuese por kam vendin tim në dhënien e kontributit për partinë,” tha Mustafaj.
Publicisti shprehu mendimin se PD ka nevojë për anëtarë aktivë dhe se strukturat aktuale të partisë janë joefiçente. “PD ka nevojë për anëtarë dhe simpatizantë aktivë, strukturat aktuale të PD janë joefiçente. Opozita duhet të fillojë të punojë në të gjitha qytetet”.
Përsa i përket aleancës me LSI-në dhe partitë e tjera opozitare, Mustafaj tha se është më shumë aleancë aktivitetesh se sa bashkim ideologjish.
“Unë e shoh si aleancë aktivitetesh në opozitë. Jam i bindur se faktori i bashkimit të të gjithë partive opozitare është në dobi të vendit. Por s’mund të kemi aleancë mes partive se kanë parime dhe ideologji të ndryshme, LSI është e majtë dhe nuk mund të bashkohet me Partinë Republikane përsa i përket ideve. Kanë programe komplet të kundërta,” tha ai
