Rreth 3000 mijë nxënës të dy shkollave 9-vjeçare në Kamëz rrezikohen nga infeksionet që mund të marrin në ambientet e shkollave. Mungesa e fondeve për mirëmbajtjen në vite ka sjell degradimin e tyre.
Nxënësit e shkollës 9 vjeçare shprehen se mundohen të shkojmë në tualete sa më rrallë pasi janë shumë të pista, ndërsa prindërit i kanë porositur të kenë kujdes pasi rrezikojnë të marrim infeksione. Albana Ymeri, drejtoresh e shkollës “Jashar Hoxha”, theksoi se për gjendjen e shkollës janë vënë në dijeni si Drejtoria Arsimore ashtu edhe Bashkia Kamëz, por ende nuk është marrë asnjë masë.
Për shkak të dëmtimit të tavanit në shkollën e mesme Ibrahim Rugova shiu që bie jashtë bie edhe brenda. Për shkak të materialit që është “pexiglass”, kati i parë mbushet me ujë dhe shpesh herë nxënësit kanë rrezikuar të rrëshqasin. Profesor i edukimit fizik Ndoc Malaj shprehet se shëndeti i nxënësve është i rrezikuar nga lagështira që mbizotëron në shkollë. Dhomat e zhveshjes dhe tualetet nuk kanë ajrosje, nuk funksionojnë as banjet e as dushet e palestrës pasi mungon uji.
Mungesën e rrjetit hidraulik, elektrik si edhe problemet e higjienës, pranohen edhe nga drejtoresha e Zyrës Arsimore Kamëz, Ermiani Cekani.
“Ankesat ia kemi parashtruar Bashkisë Kamëz, por përgjigjet e deritanishme kanë qenë se për shkak të mungesës së fondeve nuk mund të ndërhyhet. Bashkia e Kamzës kërkon nga ne që të ndërhyjmë në Ministrinë e Arsimit që të akordojnë fonde”, shprehet drejtoresha Cekani.
Zëdhënësi i Bashkisë Kamëz Artan Dervishi shprehet se Shkolla 9 vjeçare “Jashar Hoxha” kërkon restaurim të plotë. Ndërsa “Ibrahim Rugova”, është një shkollë me standarde evropiane, por mirëmbajtja është përgjegjësi e stafit pedagogjik. Janë planifikuar 2 milion lekë te reja për rehabilitimin dhe mirëmbajtjen e ambienteve të brendshme të shkollave, dhe punimet do të fillojë brenda këtij vitit. Vetëm një javë pas interesimit të gazetarëve të Fiks Fare, në shkollën “Ibrahim Rugova” filloi restaurimi i tavanit.
Drejtoresha e shkollës “Ibrahim Rugova” Luljeta Prençi, tregon se fondi për fillimin e vitit akademik 2017-2018 ka qenë 0. Ndërsa materiali që u përdorur për restaurimin e tavanit pas interesimit të Fiksit, nuk është i njëjtë me atë fillestar. “Nuk është bërë izolimi i duhur nga punonjësit sepse edhe pas ndërhyrjes, përsëri shiu bie brenda , ndonëse jo në të njëjtën masë siç depërtonte më parë. Nga bashkia nuk kemi marrë asnjë fond për mirëmbajtje. Edhe kur ka patur thyerje xhamash, ne kemi paguar punonjës dhe i kemi vendosur vetë”, përfundon zj. Prençi.
Edhe pse këtë vit shkollor këta nxënës e mbyllën në të tilla kushte, shpresojmë se vitin e ri akademik 2018-2019 të ndryshojë situata./tch
