CEZ nuk bëri asnjë investim në përmbushje të detyrimeve kontraktuale me shtetin shqiptar. Përpos kësaj, bënte shpenzime për paga të larta e makina luksi.
Në një përfundim të tillë ka arritur avokati ndërkombëtar i kontaktuar nga shteti shqiptar. Ky u bë i ditur në Komisionin Hetimor Parlamentar për prishjen e kontratës me CEZ nga ana e shtetit shqiptar, nga ish-Avokatja e Shtetit, Ledia Mandia.
“Në tetor 2012 u vumë në dijeni konflikt shtet-CEZ. Në raste të tilla bëhet kontraktimi i studiove ligjore. U ngrit grupi punës dhe u kontraktua një studio ligjore. Thelbi i nisjes së konfliktit, ishte, mos furnizimi me energji si dhe mosinvestimet nga ana e CEZ. U bënë përpjekje për gjetjen e një zgjidhje”, u shpreh Mandia.
Sipas Mandias, në 4 dhjetor 2012, takim në Vjenë, sipas plan-veprimit të avokatit ndërkombëtar.
“Në 4 dhjetor 2012 është bërë një takim në Vjenë, bazuar në një plan veprim të bërë nga avokati i çështjes. Në këtë moment është shtruar një platformë. Nga kompania CEZ është kërkuar që çështja ti ngelej thjesht CEZ shpërndarjes, pra mos shkojë në detyrimet që kishte kompania mëmë CEZ a.s. Kompania CEZ kërkonte 300 milionë euro dhe daljen nga Shqipëria. D .m. th.:, blerje të aksioneve me 1 euro nga shteti shqiptar dhe më vonë edhe likuidimi prej një vlerë 300 milionë euro. Ndërsa nga pala shqiptare është shtruar në një platformë tjetër që duhet të shkonte edhe më tutje në mospërmbushjen e detyrimeve kontraktore që vinin nga kontrata e privatizimit, duke iu referuar mos, mos bërjes së investimeve, borxhit të keq, mos mbledhjes së faturave etj.
Avokati i palës shqiptare ka deklaruar aty se investimi ishte zero. Ndërsa pala ka pretenduar se përveç investimeve kishte marrë dhe dy kredi dhe sipas tyre ishin borxhe që kishin marrë për ngritjen e kompanisë, por sipas titullarëve të institucioneve këto borxhe nuk ishin marrë për ngritjen e kompanisë pro ishin për blerjen e makinave të luksit, për pagat e larta të zyrtarëve të larta që ishin aty.
Pas këtyre diskutimeve është dërguar me shkrim edhe kundërpropozimi i palës shqiptare. Është dërguar më vonë një përgjigje nga pala çeke, por në të vërtete nuk kishte asnjë përgjigje por ka pasur deklarata në shtyp që ne do të tërhiqemi nga Shqipëria”, sqaroi Mandia.
Nga ana e tij, drejtuesi i komisionit, Edmond Spaho, duke publikuar një dokument, bëri të ditur se
“CEZ kishte një detyrim prej 345 milionë euro ndaj shtetit shqiptar dhe se është bërë e pranuar skedulimi për shlyerjen e tyre”.
Ish-Avokatja e Shtetit konfirmoi se
“CEZ ka pranuar detyrimet dhe ka bërë të ditur shlyerjen e tyre sipas kalendarit të rënë dakord. Avokati ndërkombëtar bëri të ditur se mënyra e prishjes së kontratës nga CEZ, do të shkojë drejt gjyqit. CEZ pretendonte se kishte konflikt me DIA-n dhe se shteti nuk kishte pse përfshihej në detyrimin 138 milionë eurosh. Për këtë konflikt, në 1 tetor 2013, vura në dijeni zyrtarisht kryeministrin Edi Rama dhe ministrin e Energjetikës Damian Gjiknuri. Jam thirrur në zyrë nga ministri Gjiknuri ku edhe i shpjegova situatën”.
Me ndërhyrjen e tij, Spaho kujtoi se
“Gjiknuri është shprehur se morëm përsipër zgjidhjen e konfliktit se na u imponua nga çekët”.
Nga ana e saj, dëshmitarja Ledia Mandia, konfirmoi se
“CEZ kërkonte 300 milionë euro për t’u larguar nga Shqipëria dhe pretendonte se në arbitrazh do të fitonte 500 milionë euro. Shteti shqiptar nuk ju drejtua arbitrazhit ndërkombëtar për konfliktin me CEZ”.
DRONI.al
