Takimi Bushati-Kotzias vijoi në ditën e dytë të bisedimeve në Korcë në përpjekje për të zgjidhur një sërë cështjes të mbetura pezull mes dy vendeve. Bisedimet e një ditë më parë zgjatën 4 orë dhe më pas dy minitsrat e jashtëm darkuan në një restorant afër pazarit, ndërsa edhe sot nuk është dhënë asnjë informacion.
Pritet të jetë progres lidhur me shfuqizimin e ligjit të luftës, pronat apo problemet konsullore. Më e vështirë konsiderohet çështja e kufirit detar, ku ende nuk ka të dhëna se në ç’pikë kanë avancuar negociatat.
E vetmja çështje që tashmë konsiderohet e tejkaluar pas vendimit të qeverisë shqiptare është ajo e varrezave për ushtarët greke të rënë në Shqipëri gjatë Luftës së Dytë Botërore, ku pritet të nisë zbatimi i marrëveshjes mes dy vendeve.
Ndërsa sot përpara hotelit ku zhvillohej takimi qytetarë nga Lezha protestuan për rastin e Pëllumb Marnikollajt, i cili humbi jetën gushtin e dy viteve më parë teksa mbahej i arrestuar në një komisariat të Athinës.
Ekspertiza doli në përfundimin se i riu vdiq pasi u hodh nga një lartësi e madhe, por familjarët nuk janë të bindur në vërtetësinë e saj. Me pankarta në duar ata kërkuan zbardhen e ngjarjes dhe vënien e autorëve para drejtësisë. E shoqja e Marknikollajt kërkoi zbardhjen e vrasjes duke iu drejtuar mediave përpara dritareve të sallonit ku zhvilloheshin bisedimet Bushati-Kotzias.
