Skenat e dhunës në Parlamentin e Maqedonisë, arrestohet ish-ministri i Brendshëm Mitko Çavkov

Policia e Maqedonisë ka zbatuar mëngjesin e sotëm urdhërin e prerë të prokurorisë për të arrestuar ish-ministrin e Punëve të Brendshme dhe drejtorin e Byrosë për Sigurinë Publike, Mitko Çavkov. Ish-zyrtari i lartë maqedonas është arrestuar, pasi ka rezultuar fajtor për hetimin mbi dhunën e ushtruar në Kuvend më 27 prill, kur ai drejtonte shtabin operativ të MPB-së. Sipas “Tetova sot”, prej strukturave më të ulëta të MPB-së është theksuar se Çavkov për mëse dy orë nuk ka dhënë urdhër për veprimin e policisë, me çka e ka vënë në rrezik jetën e deputetëve dhe gazetarëve. Pritet që Çavkov të dërgohet para trupës së Gjykatës Penale për procedurë paraprake.