Prokuroria ka mbyllur hetimin rreth gjashtë muaj pas ngjarjes së ndodhur në Burgun e Shënkollit në Lezhë, ku pas një zjarri mbeti i vdekur i burgosuri Flamur Sula. Konkluzioni i organit të Akuzës është se zjarri u vendos nga vetë viktima Flamur Sula, me qëllim vetëvrasjen.
Por kjo kundërshtohet nga familjarët e 31-vjeçarit. Babai i viktimës, Nuredin Sula, është i bindur se djali i tij është vrarë qëllimisht dhe nuk është i vërtetë konkluzioni i dhënë.
Ai shprehet për “Panorama” se i ka humbur shpresat te drejtësia shqiptare dhe se tashmë këtë çështje do ta ndjekë deri në Strasburg për të zbardhur të vërtetën për shkakun e zjarrit që i shkaktoi vdekjen të birit të burgosur.
Z. Sula, jeni interesuar në Prokurori ju mbi hetimet e vdekjes së djali tuaj në ambientet e Burgut të Shënkollit?
Që prej momentit kur ka ndodhur ngjarja, unë kam kërkuar që të zbardhet e vërteta. Qelia ku ishte djali im u përfshi nga zjarri ku dhe gjeti vdekjen. Që në atë moment unë isha i bindur se ngjarja nuk kishte ndodhur aksidentalisht, por djali im është vrarë me qëllim. S’kam reshtur duke kërkuar të vërtetën e ngjarjes, po Prokuroria tani më thotë se nga hetimet rezulton se djali im ia ka vënë vetë flakën dhomës?
A ju dhanë informacion të detajuar në Prokurori? Pse mendoni se konkluzioni i dhënë nuk është i vërtetë?
Kam shkuar në Prokurori për t’u interesuar dhe më thanë të mos shkoja më, pasi dosja është mbyllur si vetëvrasje. Më thanë se kanë hetuar dhe nga provat e siguruara rezulton se Flamur Sula e ka vënë vetë zjarrin për t’u vetëvrarë. Por kjo nuk është aspak e vërtetë. Të gjitha provat janë manipuluar. Unë, dy ditë para se të ndodhte ngjarja kam folur në telefon me djalin dhe ai nuk kishte asnjë problem dhe as shqetësim. Jam krejtësisht i bindur se ai nuk ia ka vënë vetë zjarrin dhomës së burgut. Nga kontaktet që unë kam pasur me shokë të djalit, të cilët e kanë parë ngjarjen, ata më kanë thënë se gjithçka ka qenë e qëllimshme. Nuk mund t’ia vë gishtin askujt me kë mund të jetë konfliktuar djali im, por kjo që po them është e vërtetë.
A keni pasur kontakte më parë me drejtues të Burgut apo dhe të Prokurorisë?
Kam tentuar disa herë për t’i takuar dhe për të gjetur të drejtën time, por ka qenë e pamundur. E vetmja përgjigje që më kanë dhënë ka qenë se djali ia ka vënë vetë flakën qelisë së burgut dhe s’ke pse e kërkon më gjatë këtë çështje. Tashmë dosja është mbyllur si vetëvrasje.
Çfarë kërkoni ju tani pas hetimeve?
Unë i kërkoj Prokurorisë së Përgjithshme dhe të gjitha institucioneve që kanë ndikim në këtë punë që ngjarja të rihetohet nga fillimi. Duhet të merren të gjitha provat dhe dëshmitë e atyre që kanë parë ngjarjen në atë momente, pasi unë mendoj se hetimet nuk janë bërë ashtu siç duhet. Provat janë manipuluar, ashtu siç u ka interesuar drejtuesve të burgut, pasi qëllimi i atyre ka qenë që mos të zbardhet e vërteta, sepse ata janë fajtorë për atë çfarë ka ndodhur brenda qelisë së Shënkollit. Unë nuk do të resht së kërkuari drejtësi. Do të shkoj deri në Strasburg që kjo ngjarje të zbardhet dhe personat përgjegjës të shkojnë para drejtësisë. Me këtë hetim të Prokurorisë mua ma kanë vrarë djalin për herë të dytë. Nuk kam besim te shteti shqiptar dhe te drejtësia këtu, sepse është e korruptuar dhe kapur nga koka deri te këmba.
