DETAJE/ Në vitin 2005, Durim Keçi në listën e mafiozëve më të rrezikshëm në Itali

Në një artikull investigativ të revistës italiane “L’Espresso” publikuar në janar të 2006, i sapo arrestuari shqiptar Durim Keçi deri më vitin 2005 rezultonte në listën e bosëve mafiozë më të rrezikshëm në Itali, ndaj të cilëve ushtrohej regjimi i burgimit special i quajtur “41 bis”.
Ky lloj trajtimi nënkupton një izolim të plotë të të burgosurit pa asnjë mundësi komunikimi me të burgosurit e tjerë, mbikëqyrje speciale, limitim të komunikimit me familjarët dhe avokatët, ndalim i marrjes së ushqimit apo objekteve të tjera nga jashtë burgut, ndalim i mbajtjes në qeli të objekteve personale, etj.
Nën këtë regjim special burgimi ndodhen aktualisht bosët mafiozë të “Cosa Nostra” si Toto Riina, Bernardo Provenzano. Matteo Messina Denaro etj.
Në materialin investigativ të revistës italiane “L’Espresso”, deri më vitin 2005 në listën e të dënuarve të rrezikshëm në Itali e nën regjimin e burgimit të ashpër “41 bis” ndodheshin dhe dy bosë mafiozë shqiptarë: Haki Aleksi me aktivitet kriminal në Xhenova e Durim Keçi.
Investigimi i revistës italiane zbulon se në fund të 2005 dy bosëve shqiptarë Haki Aleksi e Durim Keçi u hiqet regjimi i burgimit të izoluar “41 bis”.
“Surprizisht zbulojmë, shkruan “L’ Espresso”, se vendimin për deklasimin dhe heqjen e ‘41 bis’ ndaj dy bosëve mafiozë shqiptarë, nuk e merr siç bëhet zakonisht nga Gjykata e Mbikëqyrjes, por ky vendim vjen drejtpërdrejtë nga Ministria Italiane e Drejtësisë”, e cila drejtohej në atë kohë nga Roberto Castelli, eksponent i lartë politik i forcës “Lidhja e Veriut”.
“Vëtëm në 3 raste të tjera ndaj 3 bosave më të vegjël mafiozë, Ministri i Drejtësisë ka marrë një vendim të tillë”, shkruan “L’ Espressso”.
Pas deklasimit, pra pas heqjes së regjimit të burgut special “41 bis”, i dënuari kthehet në një të burgosur të zakonshëm.