Rama kërkon shkarkimin e të gjithë kryetarëve të njësive administrative: “Duhet hapësirë për të rinjtë që duan të kontribuojnë”
Kryeministri Edi Rama ka dhënë një urdhër të qartë për drejtuesit vendorë, duke kërkuar largimin e të gjithë kryetarëve të njësive administrative në të gjithë vendin. Gjatë një takimi me krerët e bashkive, Rama theksoi nevojën për një rifreskim të strukturave drejtuese dhe hapje ndaj atyre që duan të japin kontribut në rrugën drejt integrimit të Shqipërisë në Bashkimin Evropian.
“Faleminderit dhe shpresoj që ditën e hënë të gjithë kryetarët e njësive administrative të jenë të shkarkuar. Duhet të hapim dyert për ata që nuk na njohin personalisht, por na kanë votuar sepse besojnë se mund të bëjmë më mirë,” tha Rama. Ai theksoi se votat e marra në zgjedhjet e 11 majit ishin më të lartat ndonjëherë dhe sipas tij kjo tregon besim të shtuar nga qytetarët, jo domosdoshmërisht nga anëtarësia e Partisë Socialiste.
Rama tha se nuk mund të arrihet objektivi i anëtarësimit në BE deri në vitin 2030 duke përsëritur të njëjtat gabime, dhe kërkoi një frymë të re në administratën vendore. “Shumica dërrmuese e drejtorëve dhe kryetarëve të njësive duhet të zëvendësohen. Duhet t’u japim hapësirë të tjerëve, për të parë si mund të funksionojnë ndryshe institucionet,” shtoi ai.
Një mesazh i drejtpërdrejtë iu drejtua edhe policisë së shtetit, veçanërisht pas vendimit për shkarkimin e drejtorit të policisë në Shkodër, si pasojë e ndërtimeve të paligjshme në Theth. Rama deklaroi se asnjë drejtues policie nuk mund të justifikohet se “nuk dinte” çfarë ndodhte në territorin e tij.
“Policia e di të ngjitet në maja malesh për të ndaluar një fshatar që po ndërton një avlli. Po si nuk sheh dot resortet pa leje që ngrihen në bregdet dhe ndotjen që shkaktojnë? Ndaj, ajo që ndodhi në Shkodër është një paralajmërim për të gjithë,” u shpreh kryeministri.
Ai theksoi nevojën për barazi në zbatimin e ligjit dhe për t’i dhënë fund dy standardeve në menaxhimin e territorit. a.b
