Nikoll Deda, ish-presidenti i Urdhrit të Stomatologut, në arrest me burg për tre vepra penale
Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm në Tiranë, është caktuar masa e sigurisë “arrest në burg” për Nikoll Dedën, ish-presidentin e Urdhrit të Stomatologut të Shqipërisë. Ai akuzohet për tre vepra penale: “Vjedhje e kryer duke shpërdoruar detyrën”, “Shpërdorim detyre” dhe “Veprime në kundërshtim me vendimin e gjykatës”, të parashikuara nga nenet 135, 248 dhe 321 të Kodit Penal.
Hetimi nisi pas kallëzimit të shtetasit A.G., i cili denoncoi përdorimin abuziv të fondeve publike dhe rritjen e buxhetit të institucionit në kundërshtim me ligjin. Sipas Prokurorisë, gjatë drejtimit të institucionit, Deda rriti në mënyrë të pajustifikuar buxhetin e Urdhrit të Stomatologut: nga 38.5 milionë lekë në vitin 2020, në 52 milionë lekë në 2021 dhe më pas në 125.8 milionë lekë në 2022, përfshirë blerjen e një godine dhe investime të tjera.
Prokuroria dyshon se kjo rritje buxheti është përdorur për përfitime personale apo për persona të tretë. Gjithashtu, sipas raportimeve, Deda ka shmangur veprimet hetimore të policisë gjyqësore, duke rritur rrezikun e arratisjes dhe pengimit të hetimeve.
Nga hetimet rezulton se që prej vitit 2016, ai ka punësuar persona të afërt pa ndjekur kriteret ligjore, me qëllim që të ndikonte në vendimmarrjet e Këshillit Kombëtar të Urdhrit të Stomatologut. Edhe pse aktualisht është në proces gjyqësor për një tjetër çështje penale, ai ka vazhduar të marrë vendime dhe të përqendrojë kompetencat në mënyrë të paligjshme.
Prokuroria vlerëson se masa e arrestit është e domosdoshme për të garantuar vijimin e hetimeve dhe shmangien e çdo përpjekjeje për të ndikuar në provat ose për t’i shpëtuar drejtësisë.
