Marine Le Pen, figurë kyçe e politikës franceze dhe udhëheqëse historike e së djathtës ekstreme në vend, është shpallur fajtore për shpërdorim të fondeve të Bashkimit Europian. Sipas vendimit të gjykatës, Le Pen akuzohet se ka përdorur në mënyrë të paligjshme fondet e BE-së për të financuar aktivitetet e brendshme të partisë së saj, Fronti Nacional (sot i njohur si Rassemblement National), një shkelje që trondit themelet e fushatës së saj për presidencën e vitit 2027.
Ndërsa gjyqtari ende nuk ka shpallur dënimin përfundimtar, prokuroria ka kërkuar një paketë ndëshkimesh të rënda, përfshirë një gjobë prej 300 mijë eurosh, një dënim me burg dhe ndalimin e Le Pen-it nga kandidimi për poste publike për pesë vitet e ardhshme. Më e rëndësishmja, prokurorët kërkojnë që ky ndalim të hyjë në fuqi menjëherë, pa pritur përfundimin e procesit të apelimit që Le Pen pritet të ndërmarrë.
Hetimet, të cilat kanë zgjatur prej disa vitesh, zbuluan se dhjetëra asistentë parlamentarë të Frontit Nacional, të paguar nga fondet e Parlamentit Europian si punonjës në Bruksel, në fakt punonin në Francë në shërbim të partisë dhe jo të detyrave institucionale të BE-së. Kjo skemë, sipas hetuesve, i ka kushtuar taksapaguesve europianë qindra mijëra euro.
Vendimi i gjykatës vjen në një moment kyç për Le Pen, e cila ka konsoliduar pozicionin e saj si rivalja kryesore e presidentit Emmanuel Macron dhe një nga kandidatët më të fortë për zgjedhjet presidenciale të ardhshme. Një ndalim i mundshëm nga politika do të kishte pasoja të mëdha për skenën politike franceze, por edhe për të ardhmen e së djathtës ekstreme në Europë, e cila e sheh Le Pen si një nga figurat më të fuqishme të saj.
Përfaqësuesit e partisë së Le Pen kanë reaguar duke e cilësuar vendimin si “politik” dhe “të motivuar nga frika e elitave tradicionale”. Ndërkohë, mbetet për t’u parë nëse apelimi që pritet nga avokatët e saj do të ndryshojë rrjedhën e kësaj çështjeje me pasoja të thella politike. r.b
