Ish-Drejtori i Departamentit për Teknologjinë dhe Informacionin në Policinë e Shtetit, Ervin Muça tha sot se akuzat ndaj tij për ndërhyrje në sistemin TIMS janë spekulime mediatike ndërsa nuk komentoi gjetjet e hetimit dhe akuzën e prokurorisë për vjedhjen e të dhënave të TIMS.
Ai u paraqit sot në ambientet e gjykatës, teksa tha se ka vepruar sipas procedurës.
Pyetje: Për çfarë qëllimi i keni përdorur të dhënat e TIMS?
Ervin Muça: E gjitha kjo është një spekulim mediatik, gjykata do ta vërtetojë këtë, deklarohem i pafajshëm. Kam bërë thjesht detyrën. Nuk ka lidhje kodi i punonjëses. Janë të gjitha të bëra sipas procedurës.
Pas përfundimit të seancës, Gjykata e Tiranës ka lënë në fuqi masën e sigurimit “arrëst në shtëpi” për Ervin Muçën dhe masën e “pezullimit nga ushtrimi i detyrës”.
Më 9 Prill, Prokuroria e Tiranës ka kërkuar arrest shtëpie dhe pezullimin nga detyra për Ervin Muçën. Ai akuzohet se ka eksportuar bazën e të dhënave të sistemit TIMS në Policinë e Shtetit. Ndaj tij është ngritur akuza “Hyrje e paautorizuar kompjuterike”. a.b
