U emërua sot nga këshilli bashkiak në krye të bashkisë së Himarës, nënkryetarja e kësaj bashkie nën drejtimim e Jorgo Gorës, Blerina Bala.
Ajo u zgjodh 15 vota pro nga 21 anëtarët e këshillit bashkiak të Himarës, për të marrë drejtimin e përkohshëm të bashkisë deri në zgjedhje të reja ndërsa dy kryetarët, ai i zgjedhuri Fredi Beleri dhe ai që ishte në detyrë, Jorgo Goro janë në burg.
Blerina Bala mori votat e 9 këshilltarëve PS-së, 1 të këshilltarit të grupit të Lulzim Bashës, 1 të këshilltarit të Rithemelimit, 1 të Partisë së Lirisë të Ilir Metës, 1 të PSD-së, 1 të Partisë Mega dhe 1 të LZHK-së.
Votimi në këshill u krye nën tension ku banorë të Himatës u futën në ambientet e sallës dhe nuk lejuan as Prefektin Vangjel Tavo, të merret pjesë në mbledhje. U desh ndërhyrja e policisë që mbledhja të vijonte.
Në lidhje me votimin në këshill ka reaguar edhe kryeministri Edi Rama.
“Zgjedhja e sotme nga Këshilli Bashkiak të Himarës, me 15 vota pro dhe vetëm 4 kundër, e nënkryetares së bashkisë, Blerina Bala, si kryetare në detyrë është një zhvillim pozitiv për vazhdimin e punës së qeverisë vendore.
Përpjekja e dështuar e një grushti individësh të nxitur për ta penguar këtë zhvillim të bazuar në detyrimin përkatës ligjor të Këshillit Bashkiak, tregoi qartë faktin e thjeshtë se shumica e madhe e himariotëve nuk i përkasin llogores së konfliktit, përçarjes dhe amplifikimit absurd të një sherri primitiv, i cili ushqehet për interesa dhe hesape që s’kanë asnjë lidhje me interesat e Himarës”, deklaroi Rama. a.b
