Deputeti i PD, Gazment Bardhi në një deklaratë për mediat në përfundim të mbledhjes dë deputetëve tha se është i gatshëm të takohet me cilindo që mendon ndryshe nga ai, përfshirë edhe Sali Berishën me qëllim që të diskutohen rrugët për bashkimin e partisë.
“Ajo që ka rëndësi për PD është të ndalet gjuha përçarëse dhe që sjell ndasi, kjo gjuhë solli hartën rozë nga veriu në jug të Shqipërisë. Detyra jonë është të ofrojmë zgjidhje, po punojmë për të gjetur zgjidhje, pastaj secili bën zgjedhjen e vet. Ka pasur gjithmonë komunikim mes meje dhe kolegëve të mi, pavarësisht pozicionimit në konfliktin brenda partisë. Me kolegët që mendojnë ndryshe nga unë diskutojmë sa herë takohemi, edhe ata mendojnë se të përçarë nuk fuqizohet PD, por Rama. Nuk kam asnjë kompleks të ulem me këdo brenda PD për të gjetur zgjidhje. Jam për një zgjidhje që bashkon bazën e partisë dhe kur të jetë gati mund të zgjidhet kryetari i ri”, tha Bardhi. a.b
