Kreu i Partisë së Lirisë, Ilir Meta ka konfirmuar njohjet e tij personale me personin A dhe B në dosjen e ish-zyrtarit të lartë të FBI-së, McGonigal.
Në A2 CNN, gjatë një interviste me gazetaren Alba Alishani, Meta pohoi se z. Agron Neza e njeh prej të vëllait, Agim Neza, të cilin e ka pasur zëdhënës personal gjatë kohës kur ka qenë në krye të Ministrisë së Jashtme. Ndërkohë, ai konfirmoi edhe afrinë familjare me Dorian Duçkën. Për këtë të fundit tha: Si Doriani unë kam nja 200 kushërinj, por çuditërisht asnjë tjetër nuk zgjodhi z. Rama ta kishte si këshilltar pa pagesë.
Teksa po flisnim për dosjen, z. Meta, ju thatë që “nuk po përmendim emra”, megjithatë ne këto ditë i kemi përmendur dhe shqyrtuar emrat, të cilët u zbuluan të jenë protagonistët ose inicialet e kësaj dosjeje famoze. Agron Nezën “Personin A” e keni njohur ndonjëherë nga afër?
Po unë e kam njohur “Personin A”, zotin Agron Neza si vëllai i këshilltarit tim të ndjerë për mediat, zëdhënësi im, zotin Agim Neza, i cili ka qenë zëdhënësi im në kohën që unë kam qenë ministër i Jashtëm i Republikës së Shqipërisë. Kështu që kjo është e vetmja njohje e imja me zotin Neza në këtë lloj raporti.
Për më tepër që me familjen Neza kam një raport të hershëm, që nga Zenel Neza që ka qenë Kryetari i parë i Bashkisë së Tropojës, në vitin 1992, edhe me shumë të tjerë.
Ndërkohë, emri tjetër që përmendet në akuzën ndaj agjentit të arrestuar të FBI-së është gjithashtu shqiptar, është protagonisti Dorian Duçka, të cilin ju nuk e keni përmendur me emër, por si bashkëpunëtor të Edi Ramës. Është folur për lidhjet e tij me ju gjatë kohës kur keni qenë në qeverisje. Por, zonja Kryemadhi foli edhe për lidhjet tuaja familjare, në fakt i konfirmoi ato, jo vetëm me ju, por edhe me eksponentë të mazhorancës. A ju pengon kjo pjesë në denoncimin e kësaj çështjeje, apo nuk iu komplekson emri “Duçka” në këtë mes?
Absolutisht. Së pari nuk ka se si të më kompleksojë. Së dyti kam vënë re disa spekulime për ta paraqitur gjoja si një njeri, që meqenëse ka shërbyer për LSI-në në të kaluarën, apo ka një lidhje familjare me mua, është si rezultat i këtij raporti, edhe njeri kaq i afërt i zotit Rama.
Mendoj që ky është një mashtrim publik me qëllime justifikimi për përgjegjësinë e Edi Ramës në gjithë orkestrimin e këtij skenari mafioz për korruptimin e zyrtarëve ndërkombëtarë, dhe mund t’ju them se, si Doriani unë kam nja 200 kushërinj, por çuditërisht asnjë tjetër nuk zgjodhi z. Rama ta kishte si këshilltar pa pagesë. Kështu që besoj që është shumë e qartë.
Natyrisht që ka edhe një malinjitet, sepse ai është përpjekur ta përdorë atë në ato lidhje ndërkombëtare që ai ka pasur, sigurisht duke thënë që, “ja ku është kushëri edhe i filanit”. Personi në fjalë është edhe kushëri i ministres së z. Rama, zonjës Etilda Gjonaj, por s’mund të akuzoj zonjën Etilda që ka ajo përgjegjësi për çdo veprimtari të Dorianit, apo jo?
Në rastin konkret, çdo përpjekje për të sfumuar përgjegjësinë e arkitektit dhe orkestruesit të shndërrimit të Shqipërisë, e sidomos të qeverisë dhe zyrës së Kryeministrit, në një qendër rekrutimi të zyrtarëve më të lartë e të rëndësishëm të vendeve aleate dhe perëndimore me qëllim përdorimin e tyre kundër opozitës, kundër demokracisë, kundër shtetit të së drejtës, vetëm për qëllime të brendshme dhe për të çimentuar regjimin e tij të korrupsionit, pra të gjitha këto përpjekje duhen hetuar deri në fund. Dhe duhet çmontuar i gjithë ky sistem duke vendosur secilin përpara përgjegjësisë për atë që i takon. m.k
