Anijet e para të ngarkuara me grurë u larguan nga porti Odessa i Ukrainës të hënën në orën 05:30 të mëngjesit sipas orës lokale, njoftoi ministria e mbrojtjes së Turqisë.
Anija me flamurin e Sierra Leone, e cila mban 26,000 ton misër, po shkon drejt Libanit, sipas Ankarasë.
“Zblokimi i anijeve të tjera është planifikuar brenda fushëveprimit të korridorit dhe metodës së përcaktuar” të rënë dakord më 22 korrik nga Rusia, Ukraina, Turqia dhe OKB-ja, tha ai.
Marrëveshja e eksportit synon të lehtësojë transportin e sigurt të grurit dhe produkteve të tjera bujqësore nga portet e Ukrainës. Sipas marrëveshjes, një qendër e përbashkët koordinimi, e cila nisi operacionet javën e kaluar në Stamboll, do të monitoronte anijet tregtare që eksportojnë grurin e Ukrainës për të siguruar pajtueshmërinë.
Zyrtarët ukrainas thanë se kishte 17 anije të bllokuara në portet e Detit të Zi të Ukrainës, që përmbanin pothuajse 600,000 ton ngarkesë.
Rusia dhe Ukraina eksportojnë gati një të tretën e furnizimeve globale të grurit dhe elbit.
Mbi 12 për qind e grurit në botë, 15 për qind e misrit dhe 50 për qind e vajit të lulediellit vijnë nga Ukraina, shumica e të cilave zakonisht transportohen nga deti.
Por kapaciteti eksportues i vendit është ulur ndjeshëm që nga fillimi i luftës në fund të shkurtit për shkak të bllokadës së gjatë të Detit të Zi.
Ukraina paralajmëroi të dielën (31 korrik) se të korrat e vendit mund të përgjysmohen këtë vit për shkak të luftës.
“Të korrat ukrainase këtë vit rrezikohen të jenë dy herë më pak”, tha presidenti i Ukrainës Volodymyr Zelensky në Tëitter.
Ai tha se “qëllimi kryesor” i Ukrainës ishte të parandalonte një krizë globale ushqimore që po shpaloset aktualisht për shkak të ndërprerjeve të eksportit në Detin e Zi. “Ende drithëra gjejnë një mënyrë për t’u dorëzuar në mënyrë alternative,” shtoi ai.
Ukraina pritet të korrë deri në 60 milionë tonë drithë, sipas vlerësimeve të OKB-së. Çmimet globale të ushqimeve janë rritur që nga pandemia. Por ndërprerjet e eksporteve në Ukrainë dhe Rusi i kanë shtyrë çmimet edhe më të larta, duke rritur frikën për një katastrofë të afërt të urisë në disa vende afrikane, Azinë Jugore dhe Lindjen e Mesme.
Banka Botërore paralajmëroi këtë muaj se konflikti në Ukrainë do të shtyjë 95 milionë njerëz të tjerë në varfëri ekstreme dhe 50 milionë në uri të rëndë. /Euobserver, pergaditi per droni.al, s.n
