Qeveria e Bullgarisë është rrëzuar sonte nga Parlamenti ndërsa Kryeministri bullgar Kiril Petkov ia hodhi fajin Rusisë dhe mafies së fuqishme të vendit.
Petkov nuk arriti të siguronte votat e mjaftueshme për të siguruar votëbesimin në parlament. 123 ligjvënës nga 239 në parlament votuan kundër kabinetit të tij vetëm 6 muaj pasi erdhi në pushtet.
“Ky votim është një hap i vogël përgjatë rrugës shumë të gjatë përpara nesh. Unë premtoj se do të vazhdojmë betejën për të rifituar vendin dhe, një ditë, do të kemi një Bullgari pa mjeshtra kukullash, pa mafia – një vend normal evropian”, tha Petkov në një fjalim para Asamblesë Kombëtare.
Duke dhënë një listë të njerëzve që kishin luajtur rol kyç për rrëzimin e kabinetit të tij, Petkov drejtoi gishtin nga ambasadori rus në Sofje dhe akuzoi Rusinë për ushtrimin e ndikimit të saj për largimin e tij nëpërmjet ligjvënësve nga partia e ekstremit të djathtë “Rilindja”.
Rrëzimi i qeverisë së kryeministrit Petkov erdhi pas prishjes së koalicionit me partinë e “Ka një popull të tillë” të Slavi Trifonov.
Trifonov deklaroi se patën mosmarrëveshje për buxhetin dhe akuzoi kryeministrin Petkov se po mbante një qëndrim shumë të butë për lejimin e Maqedonisë së Veriut, për të filluar bisedimet e pranimit në BE.
Në ditët e kaluara, pjesa më e madhe e debatit politik u përqendrua në atë nëse Trifonov po hiqte prizën nga qeveria për arsye që lidhen me mafien e fuqishme oligarkike të Bullgarisë , e cila do të humbiste në goditjen e premtuar të Petkov kundër korrupsionit.
Ky interpretim u nxit nga një grusht ligjvënësish nga partia e Trifonovit, të cilët dezertuan te Petkov pikërisht sepse thanë se partia e tyre ishte në anën e mafies. Trifonov u përgjigj se akuzat e mafias ishin absurde.
Partia e Petkovit, e ndjekur nga opozita, tani do të ketë mundësinë të përpiqet të mbledhë mbështetje për një shumicë të realizueshme. Nëse kjo dështon, vendi do të shkojë në zgjedhje të përgjithshme. r.j
