Ish-drejtori i Kadastrës në Sarandë Ardian Kola, është shpallur në kërkim në lidhje me tjetërsimin e 10 mijë m2 tokë në qytetin bregdetar.
Bashkë me të janë shpallur në kërkim edhe dy biznesmenët Behar dhe Bedri Muçobega. Behar Muçobega akuzohet për falsifikim dokumentash dhe Bedri Mucobega akuzohet për pastrim i produkteve të veprës penale ose veprimtarisë kriminale.
Ndërkaq Ardian Kola ka mbajtur post e drejtorit gjatë periudhës maj 2019 deri më korrik 2020. Po ashtu Kola ka qenë edhe kryetar i PS në Sarandë në kohën maj 2018-tetor 2020.
Një ditë më parë u arrestua nga policia Pandi Zhonga,drejtor i Urbanistikës në Bashkinë e Sarandës, së bashku me juristen e Agjencisë Shtetërore të Kadastrës, Rovena Alikaj si dhe Aleko Anagnostin, noter.
Gjatë hetimeve të kryera, prokuroria e Sarandës konstatoi se personat e arrestuar dyshohet se kanë kryer tjetërsimin e një sipërfaqe prej 10 mijë metra katror tokë, duke e ndarë tek persona të tjerë, të cilët më pas kanë ndërtuar. Përfituesit e tokave përmes dokumenteve të falsifikuar janë Fredi Merkuri, Valter Llomi dhe Argonida Canaj, ndaj të cilëve janë ekzekutuar urdhër arrestet.
Ardian Kola, kreu i Kadastrës së Sarandës ka dhënë dorëheqjen nga detyra pas drejtimit prej më shumë se 14 muajsh të atij institucioni. Varianti i publikuar fillimisht nga mediat lokale në Sarandë për “dorëheqje për shkak të angazhimit në fushatë për zgjedhjet e vitit 2021” nisi të mbizotëronte gjerësisht edhe në media të tjera kombëtare, për shkak të faktit se ishte burimi i parë i raportimit të atij lajmi. Por në fakt e vërteta duket të jetë ndryshe. Ardi Kola është detyruar të largohet pas një sërë denoncimesh që kanë mbërritur deri tek kryeministri Edi Rama, kreu ASHK-së, Artan Lame, platforma e bashkëqeverisjes dhe gjithashtu në Prokurori, për tjetërsimin e disa parcelave në zonën bregdetare nga ish-turizmi deri tek kanali i Çukës.a.b
