Ish-nënkryetarja e Partisë Demokratike Jozefina Topalli përsëriti sloganin e fushatës së partisë së saj në fushatën zgjedhore, në emisionin ‘Now’ në Euronews Albania se pa larguar Lulzim Bashën nga PD, Edi Rama nuk ikën nga pushteti.
Ajo tha se në këtë pikë i qëndron në mënyrë konstistente asaj që ka thënë edhe para 8 vjetësh, kur ishte ende pjesë e PD.
“Pa u larguar Lulzim Basha nuk ikën Edi Rama. Kjo s’i pëlqen Bashës, por është thelbi i së vërtetës.
Dhe vendi ynë do vazhdojë të notojë në agoni ekonomike, jo për ata që gjejnë zgjidhje përmes karriges politike. Pa larguar Bashën nuk ikën Rama, jam konsistente në atë që kam thënë në 8 vjet”, u shpreh znj. Topalli.
Sipas ish-numrit 2 të PD, Basha duhet të largohet pasi ‘nuk mund të mbajë peng jetën e shqiptarëve duke mbajtur në pushtet Edi Ramën’.
Znj. Topalli sqaroi se qëllimi i partisë me të cilën ajo garoi në zgjedhjet e 2 prillit nuk ishte të përçante votat e të djathtëve, por të sillte mandate që do të shkonin tek e djathta.
“Por këto mandate nuk do të shkonin kurrë tek Lulzim Basha si kryeministër”, tha ajo.
Ish-nënkryetarja e Partisë Demokratike, Jozefina Topalli tha në vijim të intervistës se Lulzim Basha ka punuar për përjashtimin e Sali Berishës.
“Nuk është i vështirë, është vendimi që e dëshironte më shumë se asgjë tjetër dhe prej kohësh punonte për atë”, tha Topalli në studion e “Now” me Erla Mëhillin.
Sipas znj. Topalli vendimi i Bashës është “irracionale për nga pikëpamja politike” dhe e krahason me vendimet që merr lideri i Koresë së Veriut. Euronews.al
