Edlira Naqellari, ish-drejtoresha e prokurimeve publike në Ministrinë e Brendshme, pretendon në dëshminë e saj se ajo dhe ish-punonjësit e saj kanë vepruar me profesionalizëm dhe në përputhje me ligjin për sa i përket prokurorimeve.
Ajo ka rrëfyer dhe shkëmbimin e informacionit me Drejtorin e Përgjithshëm të Policisë së Shtetit, Ardi Veliu për sa i përket ankesave të operatorëve ekonomikë.
“Në këto kushte, Komisioni i shqyrtimit të ankesave nuk mund të shqyrtonte dhe të merrte një vendim për ndryshimin ose jo, për pranimin pjesërisht apo plotësisht të ankesave të paraqitura nga operatorët ekonomik, pasi dilte jashtë kompetencës. Për këtë arsye, bazuar në një memo, informacion që më është vënë në dispozicion nga ky komision, i kemi dërguar me shkresë kërkese për rishikim drejtorit të përgjithshëm të policisë së shtetit të gjitha pretendime dhe argumentat e 4 operatorëve ekonomik në lidhje me dokumentet e tenderave, në mënyrë që ai si autoritet kompetent të vendoste nëse duhet të ndryshoheshin apo jo, nëse duhet të rishikoheshin. Dhe kështu ka ndodhur, Drejtori i Përgjithshëm i Policisë së Shtetit i ka rishikuar specifikimet teknike të artikujve të uniformës të sistemit elektronik të shpërndarjes dhe i ka dërguar pranë Agjencisë së Blerjeve të Përqendruara“, ka thënë Naqellari përpara hetuesve.
Edlira Naqellari dhe 8 ish-zyrtarë të tjerë të Ministrisë së Brendshme u arrestuan pak javë më parë me urdhër të SPAK, pasi akuzohen si përgjegjës të skandalit me uniformat e Policisë, tenderi i të cilave i kushtoi buxhetit të shtetit plot 25 milionë euro (rreth 2500 euro një uniformë).
