Aeroporti i Rinasit është mbyllur zyrtarisht për shkak të pezullimit të punës së kontrolloreve deri të enjten në orën 10 të paradites. Njoftimi është dhënë nga ICAO, Autoriteti Ndërkombëtar i Fluturimeve i cili thekson se pezullimi do të vijojë deri ditën e nesërme në orën 10:00.
Sot është mbajtur edhe një takim mes ministres së Infrastrukturës dhe Energjisë Belinda Balluku dhe 60 kontrollorëve të Albcontroll, të cilët kanë pezulluar përkohësisht punën e tyre.
Në bisedën e cila u publikua e plotë nda disa media ministrja përmend një kontrollor të shkarkuar, që sipas saj është në negociata me persona të tjerë për pozicion të ndryshëm pune, ndërkohë që për dy personat e tjerë, të cilët pretendojnë se janë pushuar, kërkoi që të bëhej sot një ballafaqim me drejtorin e burimeve njerëzore.
Teksa kontrollorët kërkuan që ballafaqimi të bëhej në praninë e të gjithëve, ministrja e refuzoi këtë ç’ka çoi dhe në përfundimin e mbledhjes pa asnjë rezultat.
Kontrollorët shprehen të vendosur se nuk do të tërhiqen nga kërkesat e tyre, në krye të të cilave qëndrojnë rikthimi në punë i 3 personave të pushuar, si dhe kthimi i nivelit të pagave, pasi sipas tyre u janë ulur në mënyrë drastike.
Kërkesat e kontrolorëve janë: Rikthim i kolegëve në punë; Shfuqizim i vendimeve të bordit; Rikthimi i pagës së plotë sipas kontratës kolektive; Transparencë financiare e plotë për vitin 2020; Një anëtar sindikate të jetë anëtarë bordi.
Kontrollorët shprehen se kjo e tyrja nuk është grevë, por një pezullim i përkohshëm i aftësisë për punë, si pasojë e stresit, një klauzolë e njohur kjo në kontratën e tyre.
Më poshtë biseda e plotë e ministres më kontrollorët (faxëeb):
Kontrollorët: Ne kërkojmë kthimin në punë të 3 kolegëve
Balluku: Kush është larguar?
Kontrollorët: Iliri dhe Lola…
Balluku: Kush është Lola?
Kontrollorët: Është shkarkuar nga puna për shkak se ka shpallur paaftësinë e përkohshme për punë
Balluku: Ilir Ciko është në negociatat e veta, nuk besoj se që ju ka kontaktuar juve, e ke kërkesën nga Ilir Ciko? Se ai është në kontakt me të tjerë, dhe me drejtorin e operacionales. A ke folur me personin, se nuk besoj që kërkon të përfaqësohet nga ju. Ai ka një marrëdhënie të vetën, lëreni të flasë për veten e vetë, vazhdojmë me dy kolegët që i keni me merak.
Kontrollorët: Sapo fola me Ilirin dhe pret të kthehet në punë, ka kontakt dhe me ju
Balluku: Unë nuk kam kontakt me njeri, nuk kam folur ndonjëherë me Ilir Cikon
Kontrollorët: Unë dje kam qenë në punë me 4 kolegë, dhe të gjithë kolegët kanë qenë të stresuar, në fund të turnit kanë shpallur paaftësinë e përkohshme, sipas shkresës që e keni firmosur vetë ju, dhe zotëria më ka thënë mua që të mos vij më në punë.
Balluku: Referojuni kodit të punës, ti nuk shkon dot në punë se thua që ke marrë borxhe te familjarët, për të jetuar. Nuk je hequr nga grafiku se t’u dha letra për ballafaqim. Prandaj Kodi i punës vendos ballafaqimin, dhe është lënë në datën 12, nuk të ka hequr njeri nga puna. Ju keni dhënë paaftësinë e punës në grup.
Kontrollori: Nëse shefat do të sillnin 3 apo 4 kontrollorë të tjerë, unë do isha përgjegjës për punët administrative. Nuk dinin që të më thonin një arsye se pse po më hiqnin nga puna, i kërkova që të më jepte referencë ligjore
Balluku: Mua nuk më rezulton asnjë person që të jetë larguar nga puna, ka vetëm pritje për ballafaqim
Kontrollorja: Këtu shkruan qartë se në ballafaqim do të njiheni mbi arsyen e zgjidhjes së marrëdhënies së punës, dhe keni të drejtën që të tregoni argumentet tuaja.
Balluku: Nëse do të kishte shkarkim nga puna, pse do të jepje ti pretendime atëherë
Kontrollorja: Kështu është bërë gjithnjë, unë nuk kam ndërprerë punën asnjëherë, unë nuk kam cënuar sigurinë ajrore, gjithçka ka ndodhur pas përfundimit të turnit.
Kontrollori: U kuptua skema juaj, donit ti pushoni dhe ndaj e keni quajtur si ballafaqim
Balluku: Iliri të vazhdojë të flasë me Tan Isakun, asnjë prej jush nuk është larguar nga puna, mos e bëni ballafaqimin në datën 12, bëjeni sot, meqë jeni mbledhur
Kontrollorja: Pse të mos e bëjmë sot që jemi të gjithë këtu
Balluku: Nuk mund të bëhet ballafaqim me drejtorin e burimeve njerëzore me kaq persona, uluni sot dhe mbani procesverbal, dhe uluni dhe sqarohuni. Nuk mund të keni kontrata në grup, duhet të ballafaqoheni veç e veç, kontratat i keni individuale
Kontrollorja: Ne nuk kemi ardhur për negociatë, kontratat kolektive i keni firmosur vetë ju (pas këtij momenti punonjësit largohen, pa u diskutuar mbi kërkesat e tjera të tyre) a.b
