Kryetari i Partisë Demokratike Lulzim Basha ishte sot në Shkodër ku vëmendjen er pati në takimet e tij tek biznesi dhe kriza ekonomike të krijuar nga keqqeverisja dhe që ka dalë në pah nga pandemia e COVID-19.
Në një takim me një grup sipërmarrësish të vegjël, kryetari Basha u njoh me situatën e rëndë të biznesit në kryeqëndrën e veriut, Shkodër.
Basha vleësoi vendimin e kryetares së bashkisë Voltana Ademi për lehtësimin e barrës fiskale ndaj bizneseve gjatë pandemisë, por ndërkohë që dënoi bllokimin që i bëri kësaj lehtësie Këshili Bashkiak i dalë nga zgjedhjet farsë.
“Falënderoj kryetaren e Bashkisë për lehtësimet fiskale ndaj biznesit gjatë pandemisë por dënoj pengimin e lehtësirave nga Këshilli Bashkiak Shkodër. Ulja e taksave, lehtësirat, mënyra e drejtë për të reaguar në pandemi. Ekonomia ka 7 vite në krizë, por pandemia vetëm sa e rëndoi gjendjen. Sot ka dalë një studim se 4900 biznese janë mbyllur dhe Shkodra ishte një ndër zonat e prekura. Falimentimi i bizneseve është vetëm nga neglizhenca e qeverisë. Jam ndjerë i zhgënjyer nga mostejkalimi i ndasive politike në Këshillin Bashkiak në një situatë të tillë. Pengimi i vendimit të bashkisë për lehtësimin fiskal të biznesit, nga frika se modeli i Bashkisë së Shkodrës do t’i nxirrte zbuluar”, – tha Basha.
Gjatë bisedës përfaqësuesit e biznesit ngritën një seri shqetësimesh për të cilat ata thonë se skanë marrë asnjë lloj zgjidhje nga qeveria, ndërkohë që sa i përket kohës së pandemisë thonë se janë
“Kam marrë 3 rroga gjatë pandemisë, por shteti mi morri të gjitha me siguracione dhe taksa”, – u shpreh një prej përfaqësuesve të biznesit artizanal në Shkodër.
Një tjetër shqetësim i biznesit është rënia e tregut sipasojë e rënies së konsumit, gjë që sipas tyre po çon bizneset në falimentim.
“Me rënien e pandemisë ne nuk kemi pasur treg. Nuk kemi pasur asnjë mbështetje nga shteti. Kam filluar të largoj punonjës se më ka rënë xhiroja 50%. Ikje përditë ka. Fuqinë punëtore e kemi shumë të pakët se ikin njerëzit jashtë”, – u shpreh një prej përfaqësuesve të agrobiznesit.
Turizmi në Shkodër ka pësuar goditje të rëndë dhe kjo po sjell edhe rritjen e numrit të të papunëve.
“Vera ishte pothuajse zero. Tani po mendohem me i përgjysmu punonjësit se e kam të pamundur ti mbaj, qiraja duhet pagujt. Me tre ndihmat e qeverisë as qiranë nuk e paguajmë dot”.
Edhe fasoneria, një prej bizneseve që megjithëse rezistoi, gjatë pandemisë është goditur po ashtu rëndë.
“Problematikat janë nga më të ndryshmet. Për me përballu krizën, duhet me investu për të gjeneru energji të tjera. Kemi bërë propozim që shteti të financojë ose me grante ose me kredi të ulëta. Akoma ska fillu kriza sepse prodhimi ka mbetur nëpër magazina. Problemi i dytë, është urdhër që nëse një pjestar del me COVID, pjestarët e tjerë duhet të karantinohen, por kjo ndikon tek ne në mungesën e punëtorëve. Do ishte mirë që në kushtet aktuale të ndihmoheshim për shpenzimet shtesë, që janë dezenfektantët”, – ngriti shqetësimin një prej sipërmarrësve të fasonerisë.
“Është shumë konfuze situata saqë njerëzit nuk e dinë se çfarë është duke u bërë. Por kjo pandemia i ka nxjerr në pah të gjitha problemet në Shkodër. Çdo biznes është në vuajtje të thellë”, – u shpreh një tjetër sipërmarrëse
Por nëse biznesi i vogël është në koma, edhe biznesi i madh po vuan pasojat e parikuperueshme të krizës.
“Ne si biznes i madh na është vënë këmba në fyt. Më shqetëson e ardhmja, pasi më duket e zbeht me këta drejtues politik”
Kryetari Basha nisur nga problematikat e konstatuara nga vetë biznesi tha se kjo pandemi vetëm sa nxori në pah krizën e thellë ekonomike nga keqqeverisja 7-vjeçare, prandaj ai tha se tani është koha për një ndryshim të madh.
“Taksa e sheshtë 9%, ulja e çmimit të karburantit, sigurimeve shoqërore, rrit fitimet e biznesit”, – u shpreh Basha duke shpalosur edhe shtyllat e programit të PD për biznesin.
“Programi ynë synon të ndërtojë rregulla të qarta, të zbatueshme dhe burokraci minimale. Taksa e sheshtë është një mënyrë për të shmangur abuzimet ndërekohë që dixhitalizimi largon taksidarët nga dera e biznesit. Inspektorët nuk mund të rrinë në derë të biznesit”.
Basha ngriti zërin për situatën e konstatuar në Shkodër që sipas tij është braktisur totalisht nga qeveria.
Shkodranët janë braktisur në luftën kundër pandemisë. Sipërmarrësit janë shumë të shqetësuar për ankthin që ka mbërthyer Shkodrën dhe për humbjen e shpresave se qeveria do t’u gjendet pranë. Xhiro e biznesit është përgjysmuar. Hoteleria po falimenton, fasoneria po dorëzohet. Dje, një numër rekord vdekjesh u regjistruan në Shqipëri. Për fat të keq, numrat e vërtetë që po fsheh Rama janë shumë më keq. Pandemia e gjeti Shqipërinë në një krizë të thellë, pas 7 vitesh gjatë të cilave Rama e gjunjëzoi ekonominë dhe rrënoi sistemin shëndetësor. Qytetarët e Shqipërisë janë ata që po e paguajnë çmimin e papërballueshëm. Shqipëria është sot vendi që jep ndihmën ekonomike më të vogël për qytetarët e saj. Kostoja e jetesës në Shqipëri vazhdon të rritet, përfshirë çmimet e ushqimeve, ilaçeve dhe transportit. Shqiptarët kanë nevojë për një qeveri funksionale që punon për popullin dhe kujdeset për të. Ne do të kujdesemi për biznesin, ne do të kujdesemi për të vetëpunësuarit, ne do të kujdesemi për të gjithë qytetarët dhe do të japim ndihmë financiare për çdo qytetar. Ne do të sjellim shpresë për Shqipërinë”, – nënvizoi Basha gjatë takimit me bizbnesin në Shkodër.
