Kryeministri i Kosovës, Avdullah Hoti, tha se të premten, më 4 shtator, pritet të prezantohet marrëveshja për temat ekonomike, që delegacioni i Kosovës dhe ai i Serbisë diskutuan të enjten në Shtëpinë e Bardhë, raporton radio Evropa e Lire.
Ai tha se këto bisedime paraqesin një hap drejt marrëveshjes finale mes Kosovës dhe Serbisë.
“Nesër presim që ta finalizojmë të gjithë këtë angazhim që kemi pasur tash e sa kohë dhe diskutimet që patëm sot”, tha kryeministri Hoti.
“Kemi bërë një hap të madh drejt përmbylljes së marrëveshjes finale”, shtoi ai.
Hoti tha se në bisedimet që janë zhvilluar të enjten në Uashington është bërë përparim ekonomik.
“Unë një gjë mund t’ju them, marrëveshje të dëmshme për Kosovën, të papranueshme për Kosovën, asnjëherë nuk kanë ardhur dhe nuk do të vijnë nga Shtëpia e Bardhë. E kemi bërë një progres të madh në çuarjen përpara të bashkëpunimit ekonomik dhe jemi një hap më afër përmbylljes së çështjes”, theksoi ai.
“Për çdo gjë që flasim me Serbinë qëllimi ynë është njohja reciproke”, deklaroi Hoti.
Ndërkaq, i dërguari i Posaçëm i presidentit amerikan për bisedimet Kosovë-Serbi, Richard Grenell, e ka përgënjeshtruar një medium, (fillimisht nje media serbe ne anglisht) i cili ka raportuar se ai i ka paraqitur presidentit serb, Aleksandar Vuçiq, një dokument për nënshkrimin e njohjes së pavarësisë së Kosovës.
“E pavërtetë”, ka shkruar Grenell në profilin e tij në Twitter.
https://twitter.com/richardgrenell/status/1301555788054437888?s=21
Më herët, ministri i Financave i Qeverisë së Serbisë, Sinisha Malli, i cili është pjesë e delegacionit të Serbisë në Uashington, u ka thënë gazetarëve që Serbia, gjatë bisedimeve, “po lufton për çdo fjali dhe për çdo fjalë”.
“Temat ekonomike, është e dukshme që nuk janë përparësi, ashtu siç kemi pritur. Pika e dhjetë e listës që na është prezantuar, flet për njohjen e ndërsjellë, ndërkaq të 16 pikat janë politike dhe jo ekonomike, të cilat i kemi pritur”, tha Malli.
