Ajo që ra në sy në deklaratën e sotme të mjekes Silva Bino, krahas leximit të shifrave, ishte ndryshimi i strategjisë në përballjen me virusin.
Ndryshe nga këshillat urdhëruese të Kryeministrit pak kohë më parë, Shefja e Departamentit të Sëmundjeve Infektive dhe Epidemiologjisë në ISHP, kërkon përdorimin e maskave kur dalim nga shtëpia për pazar.
Më 18 mars, në kohën kur përhapja e virusit në Shqipëri ishte në kurbën rritëse, Kryeministri postoi në “Facebook”, disa këshilla për qytetarët, duke u shpjeguar se perdorimi i maskave nuk duhej per njerezit normale, por vetem per ekipet shendetesore dhe njerezit e infektuar.
Sot, Bino, një ndër profesionistet më të vjetra të sistemit shëndetësor, tha me zë e me figurë të kundërtën. “Është shumë e rëndësishme të zbatohen masat, të mbahet maskë kur shkojmë në supermarket në mjedise të grumbulluara dhe të ruhet distancë midis njëri-tjetrit”, theksoi Bino. Më datë 18 mars, Shqipëria kishte 59 të infektuar, ndërsa sot ka 383 raste me COVID-19.
/DRONI.al/
