Kastriot Reçi, 47-vjeçari i cili u ekzekutua ditën e djeshme në qendër të Rrëshenit me snajper nga një distancë 150 metra nga tarraca e një pallati, ishte baba i një djali 4 vjeç dhe gruaja e tij ishte shtatzanë.
Fill pas ngjarjes së rënde, bashkëshortja e Reçi, u mor në pyetje në polici për të zbuluar detaje të reja mbi pistën e vrasjes dhe nëse kishte pasur kërcënime paraprake.
Raportohet se autori ka qenë i veshur si grua dhe e ka pritur Reçin për rreth pese orë në tarracën e pallatit për ta qëlluar. Ndërkohë përveç snajperit, është gjetur dhe një kapuç i zi, i cili është dërguar në laborator për të parë mbetjet biologjike.
Pista kryesore për policinë mbetet ajo e gjakmarrjes, pasi në vitin 2017 në Itali është vrarë vëllai i Kastriot Reçit, Gasper Reçi.
Kastriot Reçi ka edhe tre vëllezër të tjerë Tonin Reçin, Martin Reçin dhe Alfred Reçin. Dyshohet se vrasja e Reçit ka ardhur pas një seri vrasjesh të lidhura me pazaret e drogës, dhe është e 5 në listë.
/DRONI.al/
