Mungesa e furnizimit të rregullt me ujë të pijshëm ka detyruar banorët të furnizohen me ujin e autoboteve që tregtojnë nëpër Tiranë. Kjo konsiderohet dhe si shkaku i epidemisë së para pak ditëve, ku çdo ditë paraqiteshin 280 raste në Infektiv.
Nga analizat e pacientëve të cilët janë trajtuar në shërbimin infektiv rezulton se ata janë infektuar me salmonelë, e cila merret kryesisht nga ushqimet si dhe moslarja e tyre me ujë të bollshëm siç janë sallata, perimet e ndryshme mishi i pulës por edhe duart.
Të pyetur nga epidemiologët një pjesë e mirë e këtyre pacientëve kanë deklaruar se konsumojnë ujë të autoboteve. Por uji tyre mund të jetë i kontaminuar, pasi cilësia e ujit të autoboteve që tregtohet nëpër Tiranë nuk është për konsum madje as nuk i kontrollon askush.
Autobotet blejnë ujë pranë ujësjellësit të Tiranës dhe destinacioni është i përcaktuar për vaditje në mënyrë që të mos abuzohet me ujin e rrjetit që furnizon qytetarët.
Uji që ata blejnë është i patrajtuar në impiantin e Bovillës dhe askush nuk analizon cilësinë tij. Por ky ujë u tregtohet konsumatorëve me një çmim më të lirë se sa uji i ambalazhuar duke riskuar seriozisht shëndetin e konsumatorit.
Ditën me diell para syve të të gjithëve madje edhe vetë autoriteteve që duhet të mbajnë përgjegjësi këto autobote qarkullojnë lirshëm rrugëve të Tiranës madje duke thirrur në çdo lagje për orarin kur mbërrijnë.
Autoritete shëndetësore thonë se nuk kane analizuar asnjëherë ujin e këtyre autoboteve për sa kohë janë subjekte tregtare private dhe nuk janë në tagrin e tyre.
Të kontaktuar nga Top Channel ata pohojnë se monitorojnë vetëm ujin në rrjetin e ujësjellësit i cili gjithsesi nuk konsumohet për t’u pirë nga qytetarët e Tiranës. Pasi në pjesën më të madhe të familjeve konsumohet ujë i blerë cilësia e të cilët sërish ngre shumë pikëpyetje. Ndërsa për higjen konsumohet ujë i rrjetit./tch
