Kryetarja e LSI, Monika Kryemadhi, priti në një takim në selinë e LSI drejtorin e ri për Europën Qendrore e Jugore në Departamentin Amerikan të Shtetit, David Kostelancik.
Kryemadhi i shprehu zyrtarit të DASH vlerësimet më të larta për bashkëpunimin strategjik me SHBA dhe e falënderoi për mbështetjen ndër vite që SHBA ka dhënë për progresin demokratik të Shqipërisë, si dhe mbështetjen e veçantë për anëtarësimin në NATO dhe rrugëtimin e vendit tonë drejt Bashkimit Europian.
“Shqipëria ka nevojë kritike për hapjen e negociatave në tetor. Hapja e negociatave është e kushtëzuar vetëm me zgjedhje të lira e të ndershme. Për këtë arsye, zgjedhjet duhet të zhvillohen sa më parë dhe me standarde, pasi kjo është e vetmja rrugë për integrimin europian të Shqipërisë”, u shpreh në lidhje me krizën aktuale politike e institucionale që ka përfshirë vendin.
Duke e falënderuar për vizitën në Shqipëri, Kryemadhi i ritheksoi Kostelancik bindjen e LSI-së për të vijuar raportet e ngushta të bashkëpunimit me SHBA, si aleate e patjetërsueshme për paqen, stabilitetin dhe prosperitetin e Shqipërisë dhe të rajonit.
