Ish-deputetja e PD Izmira Ulqinaku ka reaguar pas veprimit të sotëm të mazhorancës dhe opozitës së re për të mbajtur një minutë heshtje në nderim të viktimave të 2 Prillit.
Kujtojmë se kërkesën e bëri Rudins Hajdari dhe kreu i Parlamentit, Gramoz Ruçi e pranoi.
Lidhur me këtë, Ulqinaku thotë se ndjehet e tradhëtuar, pasi vrasësit sipas saj të këtyre dëshmorëve dhanë shfaqje, duke mos i lënë shpirtrat e tyre të prehen në paqe.
Reagimi i plotë
U ndjeva e tradhëtuar sot, kur degjova se vrasësit e Dëshmorëve të 2 Prillit ishin ftuar t’i nderojnë ata me 1 minutë heshtje në Parlament!
Një teatër mjeran që uron për paqen e shpirtrave të Dëshmorëve të Demokracisë nga Parlamenti i diktuar prej votës së blerë nga krimi i organizuar dhe bandat e pushtetit.
Paqen e dëshmorëve të votës së lirë e prish ekzistenca Gramoz Ruçi, ekzistenca e partisë së Sigurimit të Shtetit e Byrosë Politike, që sërish sot ka shkelur mbi votën e lirë, e mbi gjakun e atyre shpirtrave që s’po i lini të prehen në paqe!
Gramoz Ruçi dhe Edi Rama! Shpirtat e tyre do të paqtohen ditën kur ju të ndëshkoheni nga vota e lirë! Dhe ajo ditë po afron!
