Nga MARIO KOXHA:
Ka gati dy vjet ose ndoshta më shumë që fjala “kazan” në Shqipëri është bërë sinonim I medias dhe personave që punojnë me të. Shumë bien dakord, ca më shumë e kundërshtojnë dhe ca më pak vrasin mendjen se kush e trazon kazanin.
Analistë, opinionistë, gazetarë, pronarë mediash e televizionesh me të drejtë, tentojnë të dalin nga ky “proces” I cili nuk ka për qëllim të përmirësojë punën e tyre por ta zbehë atë deri në krijimin e një zhargoni që do ishte turp të përdorej, “lajme kazanësh”.
Pyetja që shtrohet është se kush e trazon këtë “kazan” (në qoftë se ekziston vërtetë një I tillë), pasi elita e “pushtetit të katërt” ndodhet në të?
Rreth “kazanit” që vlon nga problemet e shqiptarëve të raportuara në media qëndrojnë një numër I madh zyrtarësh me kollare që bëjnë sikur zgjasin njërën dorë për të nxjerrë, por me dorën tjetër të shtyjnë më fort. Këta janë dirigjentët e muzikës kakofonike që kazani prodhon nga studioja e halleve të njerëzve.
Pra trazuesit e KAZANIT janë vetë ata që e kanë krijuar një të tillë, duke filluar nga qeveria, prokuroria, gjykatat dhe ca më pak partitë politike. Vetëm ata e dinë radhën e punës së funksionimit të një kazani që nga fjalori I gjuhës shqipe do të thotë “Vendi ku zhvillohet vazhdimisht një veprimtari e ethshme, ku zien lufta e mendimeve etj.; vendi ku përpunohet një mendim për të mashtruar të tjerët, burimi nga lind dhe përhapet një trillim, një shpifje etj”.
Në fund të fundit nuk ka rëndësi se kush ndodhet në kazan, e rëndësishmja është kush e drejton kazanin dhe kush jep leje për të hyrë në të.
Një pyetje tjetër që shtrohet është se a janë vërtet ata që e meritojnë në kazan (në qoftë se ekziston vërtetë një I tillë) apo dikush tjetër duhet të jetë?
Kësaj pyetje është mirë t’I përgjigjesh me pyetje.
Në kazan duhet të jenë gazetarët që bënë bujë rastin e përdhunimit në Kavajë apo institucionet shtetërore që e fshehën?
Në kazan duhet të jetë “Zëri I Amerikës” që zbuloi shit-blerjen e votave apo ata që merren me një poshtërsi të tillë?
Në kazan duhet të jenë analistët që mbështetën protestën e studentëve apo burokracia e rektorëve dhe dekanëve?
Në kazan duhet të jenë mediat online apo korrupsioni I rëndomtë që pasqyrojnë ato?
Në kazan duhet të jenë “Të Paekspozuarit” apo kompanitë fantazëm që vjedhin miliona euro të shqiptarëve?
Në kazan duhet të jetë “STOP” apo gjyqtarët që kërkojnë rryshfet dhe favore seksuale?
Të ndodhur mes këtyre “dilemave” shqiptarët e kanë të vështirë të bëjnë ndryshimin mes KAZANIT të vërtetë dhe KAZANIT të propagandës.
