‘Dialogu’ që Kryeministri Rama u kërkon studentëve, është kthyer në një çështje që ka nxitur reagime dhe qëndrime të shumta.
Kreu i Grupit Parlamentar të LSI e quan këtë si një marifet të trashë, të cilën e përdor për të fituar kohë.
Vasili i kërkon të bëjë detyrën si kryeministër.
Reagimi i plotë i Petrit Vasilit:
Kryeministër boll i bishtnove detyrës, koha e muhabeteve si atavizëm komuniste ka mbaruar.
Kryeministri ka përpara detyra, që ja imponojnë kushtetuta, programi i tij i qeverisë, premtimet publike, që ka bërë.
Kryeministri s’ka asnjë rrugë tjetër vetëm të përmbushë kërkesat.
Dialogu, apo muhabeti thënë ndryshe, s’ka asfare të bëjë me detyrën të cilës i bishtnon kryeministri.
Dialogu i kryeministrit është thjesht një marifet i trashë për të fituar kohë, për të deformuar e zhbërë kërkesat, një mundësi për të dalë në pazar e për të blerë parimet, një sjellje që detyrat i kthen në qejfe subjektive të kryeministrit.
Koha e muhabeteve si atavizëm komuniste ka mbaruar, sot është koha e veprimeve si detyra për tu përmbushur.
Zgjidhja e kushteve mizerabel të jetesës dhe të mësimdhënies s’kanë asnjë nevojë për muhabete, por për buxhete, infrastrukturë dhe ligje të mira dhe jo klienteliste si ligji i arsimit të lartë.
Kryeministër lëri llafet, selfiet, memet dhe karagjozllëqet dhe bëj detyrën, shqiptarët nuk të paguajnë për palaço rrugësh, por për të drejtuar qeverinë.
