“Na shpëtoi Zoti nga plumbat”, flasin dëshmitarët që panë vrasjen në Shkodër

Tregtarët që shesin prodhimet e tyre janë rikthyer duke vijuar aktivitetin për të siguruar të ardhurat për familjet e tyre. Shumë prej atyre dëshmitarëve që ishin të pranishëm në momentin kur u qëllua për vdekje Ferracaku nuk pranuan që të rrëfejnë ngjarjen në fjalë. Tejet të frikësuar, ata refuzuan të prononcohen duke kërkuar të mos thonë asnjë fjalë. Edhe pse një pjesë e mirë kanë qenë aty duke shitur produktet e ndryshme si çdo ditë tjetër, ata thanë të kundërtën duke mohuar se kanë qenë aty apo s’e e kanë parë momentin e vrasjes.

Madje shumë prej dëshmitarëve pohuan se nuk e kanë njohur fare viktimën dhe kunatin e këtij të fundit, edhe pse që të dy çdo ditë shisnin peshk tek markata e Rusit, vendi ku ndodhi ngjarja e rëndë. Jo vetëm shitësit, por edhe kalimtarët e rastit, shumë prej të cilëve rrezikuan nga 8 plumbat e nxjerrë nga pistoleta e atentatorit, preferuan heshtjen për shkak të frikës. Ndërsa të gjithë bënin sikur nuk kanë parë e dëgjuar asgjë edhe pse atentati ndodhi në mes të ditës, lokali ku ishin duke pirë kafe Fatos Ferracaku dhe Fatmir Mehaj ishte i hapur.

Klientët e përditshëm të asaj kafeneje të vogël kanë vijuar që të kalojnë kohën si zakonisht të pandikuar shumë nga plumbat rrëke të një dite më parë. Ndërsa, viheshin re me sy të lirë shenjat e plumbave në pjesët metalike të kafenesë apo edhe në tokë. “Na ka shpëtuar Zoti”, u shpreh njëri prej tyre, por pa da-shur që ta zgjasë më shumë apo aq më tepër që të identifikohet me emrin e tij. Ndërkaq, ngjarja e rëndë ka alarmuar policinë e Shkodrës, e cila në bashkëpunim me prokurorinë po hetojnë intensivisht për zbardhjen e plotë të ngjarjes. Burime nga policia e qytetit verior bënë me dije se në lidhje me atentatin janë shoqëruar dhe marrë në pyetje mbi 40 persona. Mësohet se mes të shoqëruarve ishte dhe anëtari i këshillit bashkiak të Shkodrës, Mustafa Lici, vëllai i Fatbardh Licit, i cili u ekzekutua në një tjetër atentat në Shkodër, të ndodhur më 10 gusht të këtij viti. Ndërkaq, gjatë marrjes në pyetje familjarët e viktimës kanë deklaruar para bluve se nuk kanë konflikte me askënd.

HETIMI

Ngjarja e ndodhur dy ditë më parë në lagjen “Rus” ka dërguar dje në Shkodër zyrtarë të lartë të Policisë së Shtetit. Në këtë qytet ka mbërritur me urgjencë drejtori për krimet e renda në Policinë e Shtetit, Niko Brahimaj, nëndrejtori i Përgjithshëm i Policisë dhe drejtor për Rendin, Gjovalin Loka, njëkohësisht ish-drejtor në policinë vendore të Shkodrës dhe një prokuror i Krimeve të Rënda. Fillimisht po analizohet nëse ngjarja duhet të bashkëlidhet në një procedim për tek Krimet e Rënda në kryeqytet apo do i lihet organit të akuzës në Shkodër. Po ashtu krerët e lartë mbërritën në policinë vendore të Shkodrës edhe për të analizuar dhe thelluar hetimet lidhur me ngjarjen e rëndë për zbardhjen e plotë të saj.

Ende policia nuk ka asnjë autor të dyshuar për vrasjen e Fatos Ferracakut dhe plagosjen e Mehajt, të cilët u qëlluan nga një person ndërsa një tjetër e priste atë me motor dhe pak pas krimit u larguan nga vendi i ngjarjes. Momentalisht policia nuk ka as pista hetimi se përse u vra 40-vjeçari Ferracaku. Motori i autorëve të krimit që u gjet i djegur në zonën periferike të Zooteknikës rezulton i paregjistruar në sistem. Nga atentati që tronditi Shkodrën kanë dalë edhe disa detaje të tjera. Burime nga vendngjarja thanëse autori i vrasjes ka pasur të veshur një xhakete ngjyre të kuqe me të bardhë, ndërsa në kokë mbante një skafandër të kuqe. Autori është ulur nga motori shumë shpejt dhe është afruar deri në rreth 10 metër. Ai ka qëlluar në ecje e sipër. Pasi ka qëlluar objektivin Fatos Ferracaku, i është afruar dhe e ka qëlluar edhe dy here të tjera në kokë viktimën për t’u siguruar se ka vdekur. Autori ka qëlluar vetëm me njërën dorë, ndërsa raportohet se ka pasur një saktësi të madhe duke qenë preciz, pra një vrasje profesioniste.

Më pas është larguar duke hipur ne motor, që drejtohej nga një tjetër person. Sapo ka hipur në motor, autori ka qenë duke futur pistoletën brenda, por më pas ka qëlluar edhe njëherë në ajër për të dhënë ndoshta edhe një mesazh. Në duar mbante doreza të zeza për të mos lënë asnjë gjurmë. Gjatë kohës kur qëlloi, autori e ka pasur xhamin e skafandrës të hapur, por nën të sipas burimeve mbante një kapuç, pra ka qenë i maskuar. Sipas burimeve motori që u gjet duke u djegur në Zooteknike ka qenë ngjyre gri, tip TMAX 550 kubik, mjet që ka një shpejtësi të madhe. Ndonëse në vendin ku ndodhi krimi i rëndë ka pasur shumë njerëz, autori nuk ka gabuar në asnjë prej plumbave. Në vendin e ngjarjes mësohet se ka qenë rastësisht edhe një efektiv i policisë, civil në ato momente, ndërsa ai ka tentuar që ta ndjekë autorin duke vrapuar, por motori është larguar me shpejtësi. Edhe personi që drejtonte motorin ka pasur skafandër në kokë, ndërsa ka qenë i veshur me rroba ngjyrë gri.

SHOQËRIMI I KËSHILLTARIT LICI

Policia e Shkodrës, dje ka shoqëruar Mustafa Licin, anëtar i Partisë Mendimi i Djathtë Liberal në Këshillin Bashkiak të këtij qyteti. Burimet bënë me dije se Lici u shoqërua që në orën 06:00 të mëngjesit. Ai ndodhej në banesën e tij në afërsi të Zooteknikës, kur FNSH me efektivë të maskuar kanë rrethuar fillimisht banesën dhe më pas kanë bërë shoqërimin e tij në komisariat. Në polici ai është pyetur rreth vrasjes së Fatos Ferracakut dhe motorit që u gjet i djegur në afërsi të banesës së tij, por Mustafa Lici ka mohuar se ka lidhje me ngjarjen apo se ka dijeni për autorët e mundshëm si dhe është shprehur se nuk ka dijeni as për motorin e djegur. Sipas tij, kur ka ndodhur atentati, ai ndodhej në Tiranë me deputetë të PD-së në një mbledhje. Pas shoqërimit familjarët e këshilltarit të Bashkisë nuk janë lejuar që të kenë asnjë lloj kontakti me të. Ata kanë kërkuar që t’i dërgojnë ujë dhe ushqime, por kjo gjë nuk është pranuar nga policia. Mustafa Lici u la i lirë pas 8 orësh që u mor në pyetje në policinë e Shkodrës./Gsh.al