Prokuroria për Krimet e Rënda ka shpallur moskompetencë për çështjen ‘Babalja’.
Mësohet se dosja i është dërguar Prokurorisë së Tiranës këtë të premte, e cila do hetojë vetëm për “kallëzim të rremë”, Albert Veliun, Fredi Alizotin, gazetarin Jetmir Olldashi dhe deputetin Ervian Salianji.
Kjo u bë për arsye se akuza e kallëzimit të rremë që është objekt i kësaj çështje nuk klasifikohet si krim i rëndë dhe Prokuroria e Krimeve të Rënda ka shpallur moskompetencën duke ia kaluar Prokurorisë së Tiranës.
Prokuroria ka nisur hetimet që nga momenti i publikimit të audio-përgjimit nga Partia Demokratike ku pretendohet se Albert Veliu fliste me vëllain e Ministrit të Brendshëm për të trafikuar drogë.
Disa javë më parë, deputeti demokrat Ervin Salianji nxorri dhe një video-përgjim në të cilën Fredi Alizoti tregonte se për të dhënë dëshminë e tij në Prokurori ishte sjellë në Tiranë nga Drejtori i Policisë së Shtetit.
Në burg aktualisht mbahet Fredi Alizoti, ndërkohë që Prokuroria ka bërë kërkesë për ekstradim nga Kosova për Albert Veliun.
