Këtë të hënë, 17 shtator, është dita në të cilën hyn në fuqi tarifa për qarkullimin në Rrugën e Kombit.
Mësohet se aplikimi i kësaj tarife ka nisur që në mesnatë dhe sipas kompanisë koncesionare procesi ka nisur pa probleme.
Por ndërkohë, banorët e zonës kanë paralajmëruar protesta për të kundërshtuar tarifat. Kujtojmë se ditën e djeshme, policia kishte zbarkuar orët e natës në Kukës dhe dukej të kishte marrë masat për protestën e sotme.
Ndërsa sot shihen të jenë të pozicionuar pranë sporteleve në gatishmëri. Më herët gjithashtu, banorët e Kukësit i pritën me protesta vendosjen e tarifave, të cilat për ta ishin të papranueshme dhe të papërballueshme.
Çfarë ndodh me tarifat?
Fillimisht, në sportel do të behet verifikimi i targës dhe banorët lokalë do të përfitojnë tarifën e reduktuar prej vetëm 100 lekësh me TVSH.
Për të shmangur vonesat gjatë pagesës, apo radhët e automjeteve, në dispozicion të drejtuesve të tyre do të jenë 10 sportele, ndërsa banorët e Qarkut të Kukësit do të kalojnë në korsinë 1 dhe 10, me korsinë e parë në sensin Kukës-Tiranë dhe tjetra në kthim.
Tarifat
Për banorët e Kukësit 100 lekë të reja. Kjo vlen për deri në 44 kalime.
330 lekë për motoçikletat dhe mjetet me tre rrota, ndërsa për banorët e Kukësit 50 lekë.
Për automjetet 5 euro ose 660 lekë.
Për kamionët dhe autobusët 2140 lekë, ndërsa kamionët e tonazhit të rëndë është planifikuar të paguhet 2970 lekë.
