Partia Demokratike e sheh vetingun e politikës si një mision të rëndësishëm historik, që do të ndajë politikën nga llumi i krimit dhe korrupsionit.
Grupi i mandatuar nga kreu i PD, Lulzim Basha, dhe përfaqësuesit e LSI-së zhvilluan të martën në kryesinë e Kuvendit mbledhjen e parë, ku edhe përcaktuan qëllimet dhe rrugën që do të ndjekin për t’i imponuar maxhorancës miratimin e projektligjit për vetingun në politikë. Kreu i grupit për vetingun e politikës, deputeti i PD-së, Ervin Salianji, në një prononcim për “Panorama”, sqaron synimet e projektligjit të depozituar në Kuvend nga opozita dhe politikanët që preken drejtpërdrejt nga miratimi i tij.
“Nëpërmjet projektligjit të depozituar, ne synojmë të çmontojmë dhe të shkulim nga trupi i sëmurë i Shqipërisë gangrenën që po e merr për poshtë, ne synojmë që nëpërmjet ndryshimeve kushtetuese, të sigurojmë zbatimin e të njëjtave norma dhe parime të vetingut për vlerësimin e lidhjeve me krimin e organizuar edhe për politikanët dhe zyrtarët e të tjerë të lartë publikë, që do të kontribuojë në dekriminalizimin e qeverisjes dhe çlirimin e qeverisjes nga krimi.
Ne e kemi konsideruar një mision të rëndësishëm dhe ky është një moment historik që do të ndajë Shqipërinë nga llumi i krimit dhe korrupsionit, pa diskutim që kjo nuk është e lehtë, askund përballja me mafian nuk është e lehtë, por unë kam besim që opozita do t’ia dalë sepse mbështetja e qytetarëve për këtë nismë është masive, të vetmit të kërcënuar dhe që sot përpëliten janë politikanët e korruptuar. Vetingu që ne propozojmë u ndërpret mandatin politikanëve të korruptuar dhe të lidhur me krimin, qofshin këta kryeministra, presidentë, ministra, deputetë apo kryetarë bashkie, duke pastruar menjëherë politikën prej tyre”, sqaron Salianji.
DREJTËSIA
Sekretari i Grupit Parlamentar të PD-së, Salianji, deklaron se për opozitën është e qartë se Kryeministri Rama dhe maxhoranca nuk e duan vetingun në politikë. Deputeti demokrat sqaron se procesi i vetingut në politikë nuk do të ndalojë SPAK-unë të bëjë hetimet e tij për çdo zyrtar të lartë të përfshirë në politikë. “Është e qartë sot, para gjithë qytetarëve, që Rama dhe PS nuk e duan vetingun në politikë. Vetingu në politikë ka për qëllim të largojë nga Parlamenti, Qeveria dhe zyrat e larta të shtetit politikanët e korruptuar dhe të lidhur me krimin.
Së dyti, vetingu është proces paralel me hetimin nga drejtësia Vetingu as nuk ndalon, as nuk përjashton hetimin nga SPAK. Madje, vetingu i politikanëve u shërben SPAK dhe institucioneve të drejtësisë për të hetuar më tej gjithë pasurinë, integritetin, lidhjet me krimin dhe çdo lidhje tjetër, vetingu e përshpejton nxjerrjen para drejtësisë të politikanëve të korruptuar apo të lidhur me krimin.
Së treti, argumenti që vetingu nuk heton të afërmit është qesharak, sepse që sot askush nuk e pengon Prokurorinë të hetojë dhe të çojë para përgjegjësisë penale gjithkënd që shkel ligjin.
Së katërti, e ritheksoj që opozita kërkon veting të thelluar dhe kontroll të pasurisë, të integritetit dhe të lidhjeve me krimin e organizuar të politikanëve. Është e qartë që Partia Socialiste po fshihet pas gjethes, nuk ka asnjë argument të qenësishëm përveçse lidhjeve të faktuara me krimin”, sqaron deputeti i PD.
VOTIMI
Demokratët e shohin si nevojë të menjëhershme kalimin në filtrin e vetingut të të gjithë ligjvënësve në Parlament dhe qeveri, pasi, sipas tyre, vetëm në këtë mënyrë do të ndërpriten lidhjet e fshehta mes grupeve kriminale dhe politikës. “Kjo do të parandalonte aleancat e fshehta e të drejtpërdrejta, para dhe pas zgjedhjeve, midis politikanëve dhe grupeve kriminale, politikanët pas miratimit të ndryshimeve kushtetuese do t’u shërbejnë qytetarëve dhe jo bandave që iu detyrohen për mbështetjen në fushata.
Ne sot kemi sanksionuar në Kushtetutë vetingun e gjyqtarëve dhe prokurorëve madje dhe vetingun e çdo polici të thjeshtë apo edhe punonjësve të Gardës që ruajnë objektet, ndërkohë që politikanët janë jashtë këtij vetingu të plotë dhe të thelluar. Miratimi i propozimit tonë garanton parimin e barazisë përpara ligjit”, thekson Salianji./Panorama
