Një ndër drejtuesit e hershëm të PD në fillimvitet ‘90, Neritan Ceka ka komentuar situatën e krijuar brenda kësaj force politike pas zgjedhjeve parlamentare të 25 qershorit. Në emisionin “Kjo Javë” me Nisida Tufën në “Neës24”, Ceka thotë se me rëndësi për ringritjen e Partisë Demokratike është mbledhja e të gjithë forcave.
I pyetur nëse rikthimi i Sali Berishës do të ringrinte PD-në, Ceka thotë se sipas tij një lëvizje e tillë nuk duhet të ndodhë, pasi rrezikon që kjo partia të rrëzohet edhe më poshtë. Për këtë ai ka përmendur edhe rastin e zgjedhjeve në Itali, duke bërë një krahasim me rikthimin e Berlusconit.
“Është a-historike kjo nuk ndodh. Unë e kam përshëndetur dorëheqjen e Berishës si një akt qytetar. Rikthimi i tij mund të jetë i rrezikshëm. Është një lloj modeli “Berlusconi” dhe sa herë që kthehet lideri për të rikandiduar në zgjedhje, ai humbet. Kjo mund të ndodhë dhe në Shqipëri. Ndaj nuk e mendoj këtë si zgjidhje”, u shpreh Neritan Ceka.
Ai tha se mes parlamentit të vitit 1991 dhe atij në ditët e sotme ka shumë ndryshim. “Parlamenti i sotëm është vetëm një hije e atij të vitit 1991”, u shpreh Ceka.
“Parlamentarët e ’91 mund të kenë qenë kryetar kooperativash, por ishin me shkollë, ndërsa sot Parlamenti është vetëm hija e tij”, u shpreh Ceka.
Sa i takon parlamentarizmit në ditët e sotme, Ceka tha se përfaqësimi i grave në politikë nuk është ai që duhet. Sakaq, ai përmendi deputeten e Partisë Demokratike, Jorida Tabaku, si një shembull i gruas në politikë.
Ai ka shprehur kritika mbi paraqitjen e deputeteve në Parlament ditët e sotme.
“Kam pritur që gratë në parlament të sheshonin gjërat. Nuk kam pritur gra në parlament me një gjuhë… Jam zhgënjyer nga mungesa e feminilitetit në Parlament. Më pëlqen agresiviteti, edhe kur hedh një çizme, që i jep një sms kundërshtarit, por gjuha është e egër jo vetëm në parlament por dhe në debate parlamentare”, u shpreh Ceka.
