KONFERENCA E FUNDVITIT/ Rama nuk e fsheh merakun, nuk do as media as opozitë

Kryeministri Edi Rama ka dalë sot përpara mediave të bëjë bilancin e qeverisjes së tij në këtë fundvit. Teksa e ka nisur me krizën artificiale që sipas tij po krijon opozita, Rama nuk ka harruar të mos bëjë të zakonshmen edhe sulmin ndaj medieve.
Sipas tij realiteti është shumë më i mirë nga sa mediat pasqyrojnë. Ai nuk la mënjanë batutën dhe as ironinë, teksa tha se në mediat shqiptare lajme janë edhe ato që thonë se, “Një makinë goditi për vdekje një gjyshe, e cila shpëtoi për një qime”. Rama shkoi edhe më tej, teksa vuri krahasimin mes mediave ndërkombëtare dhe atyre shqiptare duke u shprehur se, “Nëse televizionet italiane apo po të doni ju edhe ato britanike do merreshin me të gjitha llojet e tjegullave që bien mbi kokë nëpër fshatra atëherë lajmet e tyre do të zgjasnin 16 orë”. Rama shtoi se lajme të tipit, “Dy veta përplasen tek kthesa dhe njëri prej tyre nxori thikën”, janë lajme që hapin edicionet në televizione kombëtare. Me sa duket kronika e zeze e shqetëson kryeministrin!
Nga ana tjetër, meraku tjetër i kryeministrit në takimin e fundvitit me gazetarët ishte edhe opozita”e cila po luan me zjarrin”. Sipas tij, opozita po pengon integrimin e vendit dhe hapjen e negociatave për anëtarësim ne BE. “Konvulsionet opozitare kundër reformës në drejtësi për të bllokuar procesin e Vetting-ut përpara zgjedhje dhe duke u rikthyer me zgjedhjen e kryeprokurores janë në dëm të interesave të shqiptarëve. Opozita po tenton të krijojë një krize artificiale ne vend”, theksoi Kryeministri. Sipas tij, anëtarësimi i vendit ne BE shkon përtej interesave të ngushta politike dhe përtej një mandati qeverisës.