“Mos ma prek Valbonën”, marshimi protestuesve ndal para kryeministrisë me kërkesën për anulimin e projektit

Banorë të Valbonës dhe Shoqëria Civile marshuan në një protestës që nisi dje pasdite dhe që ka vijuar përgjatë gjithë natës para parlamentit e ka përfunduar në dyert e Kryeministrisë. Në nismën “Mos ma prek Valbonën” banorët thonë se ndërhyrja për ndërtimin e HEC-eve është shkatërrimtare për turizmin dhe ekosistemet në Luginë. Çështja është në shqyrtim aktualisht në Gjykatën e Apelit.
Pasi kanë kaluar natën përjashta, protestuesit zgjodhën ti drejtohen edhe një herë ligjvënësve shqiptarë të mos i lejojnë vijimet e punimeve për ndërtimin e HEC-eve përgjatë Luginës së Valbonës. Nën moton “Mos ma prek Valbonën” dhe me pankarta në duar ata i bënë thirje qeverisë dhe deputetëve të mbajnë përgjegjësi për një akt që mbështetet mbi dokumente të falsifikuara.
Nga Parlamenti ku qëndruan përgjatë gjithë natës së ftohtë, protestuesit marshuan drejt Monumentit të Pavarësisë, në parkun ‘Rinia’ duke kërkuar largimin e kompanive të ndërtimit nga Lugina e Valbonës. Catherine Bohn që jeton dhe punon në Valbonë por që nuk ka munguar në një përpjekje për të ndalur ndërtimin e HEC-eve i bëri thirje qeverisë t’i shërbejë interesit publik dhe jo interesit të biznesit privat. Vendqëndrimi final i protestuesve ishte sheshi përballë Kryeministrisë. Aktivistët me pankarta në duar i bënë thirrje kryeministrit Rama të heqë dorë nga ky projekt që dëmton rëndë ekosistemet dhe turizmin në Valbonë. Projekti parashikon 14 HEC-e në një segment prej 25 kilometrash në rrjedhën më të rrëmbyer të lumit. Kunder ndërtimit të HEC-eve në Valbonë janë shprehur edhe ambientalistët e huaj, të cilët kanë bërë një studim sipas të cilit një gjë e tillë do të shkatërronte ekosistemin.