Vlorë
Situata brenda qytetit të Vlorës paraqitet problematike. 25 familje janë evakuuar nga disa lagje dhe priten të largohen në tjera.
Shumë rrugë në qytetin e Vlorës janë bllokuar dhe të pakalueshme.
Durrës
Situata mjaft problematike paraqitet në zonën e Fushë Krujës, nën ujë është e gjithë zona; fshatrat e Fushë Krujës janë tërësisht të mbuluar me ujë, gjithashtu edhe një pjesë e qytetit.
Ndërkohë janë përmbytur edhe dy stacionet e pompave në Fushë Krujë. Fshatrat më shumë problematike janë Bilaj, Bubq etj. Në Fushë Kruje aktualisht janë nën ujë edhe pjesë të fshatrave të cilat nuk janë përmbytur asnjëherë më parë.
Aksi Fushë Krujë – Laç, kalohet me vështirësi pasi përballë lokal Arbëria në Fushë Krujë ka dalë uji në rrugë.
Lezhë
Reshjet e dendura të shiut kanë shkaktuar probleme edhe në Mamurras, ku për pasojë është shembur ura e mbi lumin e “Drojes”.
Nga shembja e urës është bllokuar qarkullimi i automjeteve në aksin LaçFushë Krujë.
Ndërkohë vijon që lumi “Droje” të ketë prurje të shumta.
Fier
Situata paraqitet mjaft problematike edhe në qytetin e Fierit, ku reshjet e dendura të shiut nuk kanë munguar gjatë gjithë natës, të cilat janë shoqëruar edhe me shkarkesa elektrike. Lumenjtë Seman dhe Gjanica janë paraqitur në nivele jo probleme deri më tani.
Ndërkohë, që Vjosa është në gjendje kritike dhe pritet të dalë nga shtrati nga ora në orë.
Rrugët vazhdojnë të jetë të hapura dhe të mos ketë probleme.
Gjirokastër
Mjaft e rënduar situata është edhe pjesën rrugorë të vendit. Aksi nacional Gjirokastër Kakavijë vazhdon të jetë i bllokuar për shkak të erozionit të krijuar nga ujërat në një pjesë të rrugës. Edhe zonat Zhulatit dhe e gjithë zona e Drinos janë në situatë mjaft kritike.
Tashmë dhjetëra familje janë të evakuuar.
Si pasojë e intensitetit të lartë reshjeve të shiut, aksi rrugor Kardhiq – Gjirokastër kalohet me vështirësi pasi ka dalë uji në rrugë tek pika e Viroit.
Tiranë
Situata paraqitet mjaft problematike edhe në kryeqytet, ku Forcat e Armatosura kanë punuar gjatë gjithë natës për të evakuuar banorët, që ndodheshin nën ujë. Problemet janë shfaqur që gjatë orëve të mbrëmjes, ku u bllokua autostrada Tiranë – Durrës, e cila është zhbllokuar pjesërisht.
Situata vijon të jetë kaotike, ku vetëm njëri aks është i kalueshëm me vështirësi. Në “City Park” u përdoren gomonet për të evakuuar të gjithë personat e mbetur aty, ndërsa në Vorë u përdorën ekskavatorët për evakuimin e dy familjeve që kishin mbetur në shtëpitë e tyre të rrethuara nga uji. Ndërkohë është punuar edhe në zona të tjera ku ka pasur familje të përmbytura, më konkretisht në rrugën “Shaban Bardhoshi” në Kombinat, në Yrshek, tek Ura Gjolës, pranë “QTU”.
Gjatë natës kanë punuar rreth 400 efektivë, të cilët kanë bërë të mundur evakuimin e banorëve dhe efektivë në terren, në zonën e Dervenit, në Arramejas. Po ashtu 22 banorë janë evakuuar në fshatin Hasan, në Krujë.
Ndërkohë situatë problematike paraqitet në fshatrat rreth lumit Ishëm, i cili ka dalë nga shtrati duke hyrë brenda në shtëpitë e banorë
Autostrada ne drejtimin Tiranë – Durrës është e kalueshme, ndërsa nga Durrësi drejt Tiranës është ende e bllokuar dhe po punohet për hapjen e saj.
Nga Durrësi për të ardhur në Tiranë drejtuesit e mjeteve të qarkullojnë në aksin Durrës – Vorë – Rinas-Laknas – Kamëz deri në një njoftim të dytë.
Korçë
Reshje të dendura shiu gjatë orëve të natës, por edhe në këto moment kanë shfaqur mjaftë problem. Aksi Lozhan – Moglicë është i bllokuar si pasojë e rrëshqitjes së gurëve.
Probleme janë shfaqur edhe ne aksin Bilisht – Kapshticë, pasi ka pasur rrëshqitje gurësh, por pas ndërhyrjes është zhbllokuar ky aks. Maliqi dhe fshati Lekas vijojnë pa energji elektrike prej 7orësh. Rrezikohet të përmbytet Fusha e Maliqit, e cila është pika më delikate në Qarkun e Korçës.
Ndërsa në Pogradec situata akoma paraqitet normale. Aktualisht nuk ka bllokime apo evakuime.
Kukës
Pa energji në Bashkinë Kukës janë 2 875 abonentë. Mësohet se kanë mbetur në errësirë Bashkia Has, Njësia Administrative Gjinaj (Fshatrat Kishaj e Pogaj), gjithsej 35 abonentë.
Në Tropojë është pa energji elektrike Bytyç, Tropojë e Vjetër Qendër, gjithsej 288 abonentë. Në shkallë Qarku janë pa energji 3198 abonentë. Për të ndërhyrë në riparimin e avarive janë përdorur 7 mjete transporti e 45 punonjës nga OSHEE. Janë shtuar mbi mesataren prurjet e lumenjve e të përrenjve, por pa probleme për përmbytje. Nuk ka probleme në drejtim të objekteve me rrezikshmëri si rezervuarët, të cilët janë nën kontroll me te gjithë elementet e sigurisë.
Në ora 07:00 prurjet në Liqenin e Fierzës janë 2000 m3/s.
