Bomba e ‘Kathimerini’: “Motoskafi do të shkarkonte hashash në Turqi për tu kthyer me heroinë në Shqipëri”

Gazeta prestigjoze greke ‘Kathimerini’ shkruan në numrin e sotëm se gomonia e fuqishme e nisur nga brgijet shqiptare do të shkonte në Turqi për të realizuar shkëmbimin e kanabisit me heroinën. Këto detaje të medias greke provojnë raportet ndërkombëtare, që e konsiderojnë vendin tonë një pikë kryesore për futjen e kësaj droge të rëndë në Europë.
Pjesë nga shkrimi i ‘Kathimerini’:
Sipas një burimi të mirëinformuar të “Kathimerini”, motoskafi do të shkarkonte hashashin në Turqi, prej nga – sipas një versioni – do të merrte heroinë për ta çuar në Shqipëri. I njëjti burim informacioni zbulon se i njëjti rrjet kriminal qëndron pas dy përpjekjeve për të transportuar sasi të mëdha të hashashi nga Shqipëria në Itali në prill dhe shtator 2017. Në rastin e parë, forcat e Drejtorisë së Narkotikëve të Gardës Bregdetare kishin kapur shtatë persona (dy grekë dhe pesë shqiptarë) pas një beteje aventureske në përpjekje për të transferuar – me shpejtësi të lartë – 1.5 ton hashash nga Shqipëria në Itali. Dy prej të pandehurve të çështjes mbajtën marrëdhënie miqësore me pronarin 63-vjeçar të restorantit në Mykonos deri sa u arrestuan. Rasti i dytë ka të bëjë me përpjekjen për të transferuar 2.3 ton hashash nga Shqipëria në Itali shtatorin e kaluar. Dy vetë, një italian 63 vjeçar dhe një 24 vjeçar u arrestuan për këtë rast. Gomonia që u përdor për të kryer transportin e hashashit thuhet se ishte pronë e një kompanie të të njëjtit biznesmen grek. Guardia di Finanzia italiane ishte e përfshirë në hetimet e të dy rasteve. Sipas të dhënave paraprake, transferimi i 1.6 ton hashash nga Shqipëria në Turqi ishte planifikuar të ndodhte më herët dhe u pezullua për shkak të zhvillimeve në Shqipërinë fqinje. Pjesëtarët e rrjetit kriminalë në veçanti raportohet të jenë alarmuar nga arrestimet (në tetor nga Guardia di Finanzia) të tregtarëve të drogës që transportuan 3.5 ton hashash nga Shqipëria në Itali. Ndër të akuzuarit ishte një i afërm i ish-Ministrit të Brendshëm të Shqipërisë dhe një bashkëpunëtor i ngushtë i Kryeministrit Ed Rama, Saimir Tahiri …