Prokuroria hetim pasuror për Saimir Tahirin, gjurmon paratë e ish-ministrit dhe disa të tjerëve

Përpos hetimit nga grupi i prokurorëve të Krimeve të Rënda për trafik droge, ndaj Saimir Tahirit ka nisur edhe hetimi pasuror. Njësia antikorrupsion pranë kësaj prokurorie do të hetojë pasurinë e Tahirit, Orest Sotës dhe vëllezërve Habilaj.
Burime pranë prokurorisë thanë se Tahiri, Sota, vëllezërit Habilaj dhe disa persona të tjerë do verifikohen mbi pasuritë e paluajtshme, llogaritë bankare dhe pasuri të tjera, për të mësuar nëse ata i justifikojnë këto pasuri ose jo. Ndërkohë do bashkëpunohet ngushtë dhe me ILDKPKI-në lidhur me këtë rast.
Po sot, Prokuroria e Elbasanit shpalli moskompetencë për hetimin e Orest Sotës duke e dërguar dosjen tek Krimet e Rënda.
Vendimin për bashkimin e dosjes së Sotës me atë të ish-ministrit të Brendshëm Saimir Tahiri, do ta marrin 3 prokurorët e çështjes, që kanë nën hetim deputetin prej datës 17 tetor.
Biznesmeni 25-vjeçar u prangos në Elbasan, pasi në makinën e tij u gjeten 863 mije euro dhe dy patenta te ish-ministrit Tahiri. Ai deri tani ka deklaruar se paratë janë të tijat ndërsa patentat i ka harruar shoferi i Tahirit.