Qeveria ka marrë vendimin saj të parë në mbledhjene pasdites fill pas betimit në Presidencë që lidhet me përkujtimin e Skënderbeut duke e quajtur 2018, viti i Skënderbeut
Në vendim janë përcaktuar edhe anëtarët e komisionit shtetëror
V E N D I M
PËR
SHPALLJEN E VITIT 2018 “VITI MBARËKOMBËTAR I GJERGJ KASTRIOTIT-SKËNDERBEUT”
Në mbështetje të neneve 95, pika 2, dhe 100, të Kushtetutës, me propozimin e Kryeministrit, Këshilli i Ministrave
V E N D O S I:
Periudha 28 nëntor 2017 – 28 nëntor 2018 shpallet “Viti Mbarëkombëtar i Gjergj Kastriotit-Skënderbeut”.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
KRIJIMIN E KOMISIONIT SHTETËROR PËR ORGANIZIMIN E VEPRIMTARIVE, NË KUADËR TË “VITIT MBARËKOMBËTAR TË GJERGJ KASTRIOTIT-SKËNDERBEUT”
Në mbështetje të nenit 100 të Kushtetutës dhe nën kujdesin e Presidentit të Republikës së Shqipërisë dhe të Presidentit të Republikës së Kosovës, me propozimin e Kryeministrit, Këshilli i Ministrave
V E N D O S I:
- Krijimin e Komisionit Shtetëror për organizimin e veprimtarive, në kuadër të “Vitit Mbarëkombëtar të Gjergj Kastriotit-Skënderbeut”.
- Ky Komision të kryesohet nga Kryeministri dhe në përbërje të ketë këta anëtarë:
- a) Ministrin për Evropën dhe Punët e Jashtme;
- b) Ministrin e Mbrojtjes;
- c) Ministrin e Financave dhe Ekonomisë;
ç) Ministrin e Arsimit, Sportit dhe Rinisë;
- d) Ministrin e Kulturës;
- dh) Ministrin e Turizmit dhe Mjedisit;
- e) Ministrin e Shtetit për Diasporën;
ë) Sekretarin e Përgjithshëm të Këshillit të Ministrave;
- f) Drejtorin e Përgjithshëm të Policisë së Shtetit;
- g) Drejtorin e Përgjithshëm të Arkivave;
- gj) Drejtorin e Muzeut Kombëtar;
- h) Drejtorin e Bibliotekës Kombëtare;
- i) Drejtorin e Përgjithshëm të Institutit të Monumenteve të Kulturës;
- j) Përfaqësuesin e kabinetit të Kryeministrit.
- Me ftesë të kryetarit dhe me pëlqimin paraprak të tyre në këtë Komision ftohen të marrin pjesë:
– përfaqësues të kabineteve të Presidentit të Republikës së Shqipërisë dhe të Presidentit të Republikës së Kosovës;
– Kryetari i Kuvendit dhe zëvendëskryetarët;
– kryetarët e komisioneve parlamentare për çështjet e ekonomisë dhe integrimit evropian;
– përfaqësues të kabinetit të Kryeministrit të Republikës së Kosovës;
– përfaqësues të bashkive të Tiranës, Prishtinës, Tetovës dhe Ulqinit;
– përfaqësues të Akademisë së Shkencave;
– personalitete dhe figura të shquara, akademikë, historianë, njohës të artit dhe kulturës, si dhe përfaqësues të institucioneve e të shoqërisë civile;
– përfaqësues të komunitetit të shqiptarëve të Malit të Zi dhe arbëreshëve të Italisë.
- Komisioni të marrë të gjitha masat për hartimin dhe miratimin e planit të veprimit e të kalendarit të festimeve, si dhe të përcaktojë llojet e veprimtarive, në kuadër të “Vitit Mbarëkombëtar të Gjergj Kastriotit-Skënderbeut”.
- Komisioni mblidhet me kërkesë të kryetarit dhe sa herë që shihet e nevojshme.
- Komisioni Shtetëror do të ndihmohet nga sekretariati teknik, i cili ka këto detyra kryesore:
- a) Përgatit takimet e Komisionit;
- b) Raporton periodikisht pranë Komisionit për realizimin e detyrave të përcaktuara në mbledhjet e mëparshme të tij;
- c) Bashkërendon punën ndërmjet institucioneve të përfshira për zbatimin dhe monitorimin e detyrave të lëna prej Komisionit;
ç) Mban procesverbalet dhe harton vendimet e marra nga Komisioni;
- d) Kryen detyra të tjera që përcaktohen nga kryetari i Komisionit.
- Përbërja, mënyra e funksionimit dhe detyrat e hollësishme të sekretariatit teknik përcaktohen me vendim të Komisionit.
- Ngarkohen të gjithë anëtarët e Komisionit për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
