Atentati ndaj Gjokës, rrëfehet biznesmeni: Si u futa me gjithë familjen në komisariat

Policia e Durrësit dhe ajo e Shijakut kanë zbuluar sot, autorët e dyshuar të atentatit me automatik ndaj biznesmenit nga Shijaku, Dashamir Gjokës dhe familjes së tij, gruas me 3 vajzat, ndërsa qarkullonin me makinë. Ata janë dy vëllezër po nga Shijaku dhe të shpallur në kërkim. Gjoka ishte duke udhëtuar me automjetin e tij tip “Benz” të blinduar të tipit të ri. Si pasojë e të shtënave, fatmirësisht nuk pati të lënduar në njerëz. Ndërkaq, burime pranë policisë bënë me dije se në momentin që drejt mjetit të Gjokës është qëlluar me armë, ky i fundit nuk ka ndaluar por ka shtuar shpejtësinë për t’u shpëtuar plumbave të agresorëve. Prej andej, mësohet se Gjoka nuk ka pritur që uniformat blu të mbërrinin në vendngjarje, por në kushtet e tronditjes ai së bashku me familjen i është drejtuar menjëherë komisariatit të policisë, ku ka denoncuar atentatin që ishte përgatitur ndaj tij. Burime pranë uniformave blu sqaruan se Gjoka ka deklaruar se u qëllua nga një automjet që ecte paralelisht me të, teksa ishte duke udhëtuar në drejtim të Shijakut. Biznesmeni u ka treguar oficerëve të policisë se nuk ka arritur të dallonte armën e zjarrit me të cilën u qëllua apo se kush mund të ndodhej brenda në makinë, pasi sapo ka dëgjuar të shtënat, ka tentuar të shtojë shpejtësinë e mjetit për t’u larguar sa më parë që aty. Ndërkaq, me të marrë njoftimin, efektivët blu të cilët mbërritën në vendin ku ndodhi ngjarja nisën menjëherë hetimet për zbardhjen e plotë të rrethanave, si dhe identifikimin dhe vënien në pranga të agresorëve. Për policinë, mësohet se pista kryesore e atentatit mbetet e kaluara e biznesmenit në Itali./BW/