FOTO/ Edi Rama takim me “50 spiunët” e parë të administratës, i udhëzon dhe ju kërkon raport për shefat

Kryeministri Edi Rama u ka kërkuar punonjësve të administratës që të dërgojnë në mënyrë konfidenciale raporte për punën e tyre dhe institucionit ku ata punojnë. Këtë e ka bërë sot në një takim me 50 nëpunës të administratës, “të përzgjedhur” nga konkursi i Departamentit të Administratës Publike.
Nga “mesazhi” që ju ka përcjellë atyre, Rama i ka konsideruar ata, si “50 spiunët” e parë të rekrutuar në administratë.
Kryeministri thotë se kjo do të shërbejë për të përmirësuar administratën në 4 vitet e ardhshme, për të cilën Rama tha se është prioritet strategjik i qeverisë. Synimi i këtyre “raporteve” do të jetë goditja e elementëve parazitarë nëpër institucione.
Ai tha se duhet të mbyllen hendeqet midis drejtuesve politikë dhe punonjësve civilë të administratës.
Rama i udhëzoi ata, se si duhet hartuar dhe çfarë duhet të përmbajë raporti i gjithsecilit.
Sipas Ramës, raporti duhet të përmbajë pritshmërinë e tyre dhe realitetin; marrëdhëniet me nivelin drejtues; vizioni dhe qëllimet e institucionit; analizat e institucionit dhe përfshirjet e mundshme të tyre në këto analiza; takimet e mundshme me eprorin dhe qëllimet e këtyre takimeve; opinionin që ata ndajnë me të tjerët; atmosfera në institucion, si ndjehen punonjësit e tjerë.., etj. DRONI.al