Zguri: Ja pse refuzuam kërkesën e PDIU për rinumërimin e votave në gjithë Tiranën

Kreu i KQZ, Klement Zguri i propozuar nga PD si pjesë e marrëveshjes së 18 majit Rama-Basha ka folur për procesin zgjedhor si dhe rinumërimin e 64 kutive të Tiranës pas kontestimeve të PDIU dhe PS. I ftuar në emisionin “Natë me Xhaxhiun” në  TV “News 24” Klement Zguri tha se gabimet e shfaqura pas rinumërimit të kutive ishin për shkak të komisionerëve dhe numëruesve të cilët nuk ishin të pa trajnuar mirë.
Ndërkohë sa i përket refuzimit të kërkesës së PDIU për rinumërimin e kutive në gjithë qarkun e Tiranës, Zguri tha se kërkesa u refuzua pasi nuk kishte fakte dhe prova për hapjen e kutive.
“Profesionalisht do ishte shumë e ulët. A ka gjykim pa mosmarrëveshje. Në Tiranë nuk kishte asnjë ankimim nga asnjë komisioner. Nuk i druheshim lodhjes, por si mund të hapet një qark pa pasur prova dhe fakte? Ose një shënim se ka pasur neglizhencë nga komisionerët apo nga numëruesit”, tha Zguri.
Kreu i KQZ-së tha se çdo numërues apo komisioner që ka bërë shkelje ligjore do të përgjigjet para organeve të drejtësisë.
“Të gjithë numëruesit apo komisionerët që kanë bërë shkelje ligjore, që kanë bërë “pis” procesin, duhet të jenë të qartë se do të shkojnë dhe do të japin llogari para organeve të drejtësisë”, tha Klement Zguri.
Sakaq, kreu i KQZ-së theksoi se të gjitha provat që ky institucion zotëron për zgjedhjet e 25 qershorit do të dorëzohen në prokurori.
“Të gjithë faktet dhe provat që ne kemi dhe na janë paraqitur, ne do t’i dorëzojmë në prokurori”, u shpreh kryetari i KQZ-së, Klement Zguri.