Edi Rama: Ilir Meta “ti thërrasë mendjes” një orë e më parë

Kreu i qeverisë, Edi Rama  i ka dërguar një mesazh të fortë ish aleatit të tij në qeverisje, Ilir Metës.
Nga takimi me deputetët e rinj mbledhur sot në kryeministri nuk ka ngurruar ta falënderojë Metën si aleatin e djeshëm në qeverisje, por i ka kujtuar se mori votat për te qenë president konsensual dhe për të qenë mbi palët.
“Falënderoj Ilir Metën, jo se i çoi punët në dreq, duke hedhur në erë projektin e të majtës së bashkuar, por për çdo kontribut pozitiv dhe të pamohueshëm që dha në punën e përbashkët. Por edhe në emër të deputetëve që e votuan e s’janë këtu, i kujtoj të reflektojë një orë e më parë e të kthjellohet si presidenti që mori votat tona për të qenë konsensual për të qenë mbi palët jo kundër palëve”, tha Rama.
Ashtu si kishte njoftuar edhe më herët, kryeministri Edi Rama ka mbledhur sot për herë të parë pas fitores së thellë nëë zgjedhjet e 25 qershorit, 74 deputetët e rinj të PS-së.
Mesazhin e parë, Rama e ka pasur për fitoren e thellë dhe të pa ndodhur më parë, por ka porositur deputetet, “ta mbajmë mirë vath në vesh, unë i pari, për atë që duhet bërë”.
Sipas tij, këtë herë gjithë deputetët dhanë kontribut të vyer dhe meritojnë falënderime.
Në foks të takimit mësohet se do të jenë shqetësimet e qytetarëve ndaj administratës publike dhe plani i Ramës për administratën.
Rama do u kërkojë deputetëve të rinj që të mbledhin të dhëna dhe më pas të vënë në dijeni për çdo shqetësim që ndodh në qarqe sa i takon problemeve brenda administratës.