Droga s’ka të ndalur, edhe kur nuk mbillet, “mbin” vetë. Katër parcela me rreth 3400 rrënjë bimë narkotike të llojit kanabis sativa janë zbuluar dje në Treblovë të Vlorës, ndërsa Policia deklaron se bimët kanë mbirë vetë për shkak se aty janë asgjësuar edhe vitin e kaluar bimë të ngjashme dhe se dyshohet se është shpërndarë fara e tyre duke ndikuar në mbirjen e këtij sezoni, shkruan “Panorama”.
“Gjatë kontrollit të ushtruar në fshatin Treblovë, pranë vendit të quajtur ‘Përroi i Madh’, janë gjetur 4 parcela toke publike e papunuar me 3404 bimë narkotike të llojit kanabis sativa, me gjatësi 30-100 cm.
Dyshohet se këto bimë narkotike kanë mbirë vetë për shkak se vitin e kaluar janë asgjësuar bimë të ngjashme të mbjella në të njëjtin vend dhe që mendohet të jenë favorizuar nga kushtet klimaterike”, thuhej në njoftimin e dhënë dje nga Policia e Vlorës.
Po dje, gjatë kontrollit të ushtruar përreth një banese të banueshme në fshatin Kallarat, janë gjetur të kultivuara 106 bimë narkotike të llojit kanabis sativa.
Gjithashtu, ngjitur me banesën janë gjetur 2 thasë me thurje brenda të cilëve përmbanin lëndë narkotike me peshë prej 19.7 kilogramë, e dyshuar si kanabis sativa. Për këtë ngjarje, Policia ka arrestuar në flagrancë pronarin e banesës, shtetasin Resul Ismailaj, 63 vjeç, si autorin e dyshuar në lidhje me këtë vepër penale.
Ndërsa gjatë një kontrolli të ushtruar në fshatin Kotë, pranë një përroi, janë gjetur të mbjella në pronë publike 5 bimë narkotike të dyshuara si kanabis sativa.
