VIDEO/ Një ditë pas protestës madhështore, kreu i PD-së ka një mesazh të rëndësishëm

Kreu i Partisë Demokratike Lulzim Basha, një ditë pas protestës gjigande që u mbajt para godinës së Kryeministrisë, ka shpërndarë një videomesazh në profilin e tij në facebook.
Gjatë protestës është kërkuar dorëheqja e qeverisë dhe ngritja e një qeverie teknike, për ta cuar vendin në zgjedhje të lira dhe të ndershme.
Basha në postimin e tij shkruan:
”Sot dua t’ju falenderoj nga zemra gjithësecilin prej jush, qindra mijëra bashkëqytetarët e mi që sfiduat frikën, sfiduat provokimet e shantazhet, sfiduat propogandën qeveritare dhe u ngritët me shpresë dhe besim në zemër për të ardhmen tuaj dhe të fëmijëve tuaj në sheshin e Republikës së Re.
Mirënjohja ime është mirënjohja e njërit prej jush, por mbi të gjitha është mirënjohja e miliona shqiptarëve sot dhe e brezave që do vijnë për aktin e madh të shpalljes së Republikës së Re, republikës së qytetarëve, republikës tuaj.
Dua të falenderoj në veçanti mijëra të rinjtë e të rejat, gjimnazistët, studentët, të sapodiplomuarit, të punësuarit apo të papunët, të gjithë brezin e ri që mbushi Sheshin e Lirisë dhe me praninë e tij votoi për Republikën e Re, republikën europiane të të rinjve dhe të rejave shqiptare.
Dua të falenderoj qendrestarët e 18 Shkurtit dhe të Çadrës së Lirisë, kantjerit më të mrekullueshëm politik që ka njohur Shqipëria dhe Ballkani. Mirënjohje për të gjithë ata që i dhanë zë zërit të qytetarëve, halleve, shqetësimeve dhe shpresave të të gjithë shqiptarëve.”