Basha: Një qeverisje e kapur nga krimi sjell pasiguri për Europën dhe konsumon partneritetin me SHBA

Beteja jonë për zgjedhje të lira, është betejë për vlerat e përbashkëta dhe për sigurinë e përbashkët.
Kështu bën të ditur kreu i PD-së, Lulzim Basha, nëpërmjet një deklarate për shtyp.
Reagimi i Bashës vjen pas apelit të Nënsekretarit amerikan për çështjet politike, Thomas Shannon, i cili kërkoi zhvillim zgjedhjesh, me pjesëmarrjen e të gjitha forcave politike.
Sipas Bashës, një Shqipëri që ka humbur kontrollin e territorit dhe të kufijve, me një qeverisje të kapur nga krimi sjell pasiguri për Europën dhe kthehet në konsumator të partneritetit strategjik me Shtetet e Bashkuara të Amerikës.
“Beteja jonë për zgjedhje të lira, për demokraci të vërtetë dhe për një Shqipëri të lirë nga droga dhe krimi, nuk është vetëm për fatin e shqiptarëve dhe të ardhmen e Shqipërisë. Kjo është betejë edhe për Europën, edhe për Amerikën, sepse është betejë për vlerat e përbashkëta dhe për sigurinë e përbashkët.
Një Shqipëri e sigurt, kontribuon për një Europë të sigurt. Një Shqipëri demokratike dhe e fortë kontribuon në partneritetin strategjik dhe sigurinë euroatlantike. Ndërsa një Shqipëri që ka humbur kontrollin e territorit dhe të kufijve, me një qeverisje të kapur nga krimi sjell pasiguri për Europën dhe kthehet në konsumator të partneritetit strategjik me Shtetet e Bashkuara të Amerikës.
Liria, demokracia dhe mirëqeverisja janë të vetmet garanci për stabilitetin, sigurinë dhe mirëqenien, për sot dhe për nesër.
#NgrihemiBashkë #ZgjedhjeTeLira #RepublikaeRe”, shprehet Basha.