Edi Rama bën “zbulimin e madh”: Ja pse e organizon protestën opozita

Kryeministri Edi Rama, njëherazi edhe kreu i PS-së, e ka lidhur protestën e opozitës, me përpjekje të saj për të mos lejuar PS-në të hyjë në zgjedhje.
Që në fillim të fjalës së tij, Rama u shpreh se protesta e opozitës, po bëhet që të mos lihet Partia Socialiste të hyjë në zgjedhje, sepse sipas tij është garancia e vetme e shqiptarëve.
“Po kërkohet të harrohet pikënisja e përpjekjes  që i dha jetë nisjes së çadrës: Jo zgjedhjet e lira, por frika nga Vetingu.
Bojkoti i këtij Kuvendi nisi jo rastësisht në javën kur ky parlament duhej të merrte në shqyrtim procedurën e ndjekur dhe të vazhdonte me zbatimin e ligjit themelor për të bërë reformën në drejtësi, Vettingun.
Në thelb kjo nuk është një përpjekje për të garantuar zgjedhje të lira dhe të ndershme, nuk ka një përpjekje për të ndaluar opozitën të hyjë në zgjedhje, por për të ndaluar PS-në të hyjë në zgjedhje.
PS duhet ndaluar me çdo kusht të hyjë në zgjedhje, sepse nuk përbën thjesht një kërcënim si fituesja e mundshme e zgjedhje, por si garancia e vetme e shqiptarëve për të mos u ndaluar me zbatimin e Reformës në Drejtësi. Të gjitha të tjerat janë propagandë.
Frika nga drejtësia nuk është frikë e zakonshme që prodhon reagime të zakonshme dhe këtë nuk ka nevojë që të presim ta shohim deri në fund të shpërfaqet në gjithë përmasën e vet.
Është frika nga drejtësia që e motivon gjithë këtë përpjekje”, u shpreh midis të tjerave Edi Rama në seancën e sotme plenare në Kuvend.