Ministri i Jashtëm gjerman, Sigmar Gabriel, i tha sot kryeministrit shqiptar Edi Rama se do të ketë vështirësi të bëjë reforma në kohë zgjedhore.
“Ne duam ta çojmë përpara përafrimin e Shqipërisë me Bashkimin Europian. Plani qëndron tashmë në tavolinë. Unë dua t’ju falenderoj për reformat që tashmë jeni duke kryer dhe për angazhimin tuaj personal dhe qëndrimin tuaj në qetësimin e konflikteve në vendet fqinje. Në prag të proceseve zgjedhore e dimë që reformat nuk janë të thjeshta dhe ne në Gjermani, këtë e dimë mirë e megjithatë dimë që shumica e shqiptarëve dëshirojnë stabilizimin dhe avancimin e mëtejshëm”, deklaroi kryediplomati gjerman.
Rama ndodhet në Berlin për të marrë mbështetje ndërkombëtare ndërkohë që opozita shqiptare i ka rrethuar zyrën prej 22 ditësh.
Përmes ministrit të Jashtëm Gabriel, Gjermania ka siguruar Shqipërinë për mbështetje në rrugën e integrimit.
Ndërkohë që Rama e ka vënë theksin tek reforma në drejtësi.
“Shpresojmë shumë që të jemi në lartësinë e sfidës për të filluar zbatimin e reformës përmes Vettingu-t të gjyqtarëve dhe prokurorëve. Ashtu sikundër kërkohet dhe mirëkuptohet në rekomandimin e Komisionit Europian, për të mundur pastaj që të çelim negociatat me BE-në”, u shpreh Rama.
Ndryshe nga takime të tilla edhe Kryeministri Rama nuk i ka dhënë shumë hapësirë në faqen e vet në rrjetet sociale takimit. Ai shkruan shkurt dhe fjalë të përgjithshme rreth asaj cfarë ka folur me ministrin gjermna. “Sot me Ministrin e Jashtëm gjerman, Sigmar Gabriel, që vlerësoi lart reformat tona themelore, të cilat “kanë shënuar një përparim historik të vendit në rrugen drejt BE” dhe, po ashtu ” angazhimin e Shqipërisë në rajon si faktor kyç për stabilitetin e zgjidhjen paqësore të mosmarrëveshjeve”, komenton Rama.
