Banorët e Zharrëzës “ju vënë drurin” aktivistëve të Organizatës Politike nga protesta

Situata që u krijua në protestën e banorëve të Zharrzës kur Lulzim Basha shkoi t’i takonte, krijoi idenë se banorët e larguan kreun e Partisë Demokratike, megjithëse ky tha se kishte folur me ta për një takim. Më pas, thirrjet “Basha ik” iu artribuan aktivistëve të Organizatës Politike. Duket se pas distancimit të Partisë Demokratike nga protesta, banorët e Zharrzës i kanë kërkuar aktivistëve të largohen, një fakt që është pranuar nga vetë ata në një status në rrjetet sociale.
“Dëshpërimi i banorëve, të nxitur edhe nga personazhe meskine që vinin rrotull, bëri që mes tyre të lindnin përçarje lidhur me qëndrimin që duhej të ishte mbajtur ndaj Bashës. Disa syresh na kërkuan me keqardhje të largoheshim, me shpresën se PD-ja do t’u ofronte mbështetje logjistike. Vullnetit të banorëve iu bindëm, duke shpresuar në zgjidhjen sa më të shpejtë të situatës, por duke shprehur njëkohësisht gatishmërinë tonë të përhershme ndaj kauzës së tyre”, thuhet në njoftimin e Organizatës Politike.